Xav de nceb qus ntawm Australia noj lod: Noj puas tau mas?

Ntawm Australia no ces, tej nom tswv yeej taw qhia kom tsis txhob noj tej nceb uas tsis tau txais kev ua tib zoo txheeb ntawm tej kws paub nceb zoo, los yog tsis txhob yuav tej nceb ntawm ib lub supermarket twg, los yog ib lub khw muag khoom noj twg los noj, vim qee yam nceb yog nceb muaj taug thiab yuav raug kev phom sij loj heev yog tau noj lawm. Ces thiaj li muaj tej cai sib txawv ntawm tej xeev los tswj cov kev mus de nceb qus tom hav zoov, thiab yeej txwv tias tsis pub mus de nceb ntawm qee thaj chaw twg.

Red & white Fly Agaric fungi mushroom Amanita muscaria Source: Moment RF / Rhisang Alfarid/Getty Images

Ntsiab lus tseem ceeb:

• Tau kwv yees lawm tias muaj tej nceb txog li ntawm 250,000 hom ntawm Australia.
• Yog li thiaj yuav tau siv cov kev ceev faj thiab cov kev paub los txheeb tias seb hom nceb twg yog hom noj tau ntawm Australia.
• Cov nceb Death cap mushrooms ces yog ib co nceb uas txheeb tau nyuaj tshaj plaws ntawm lwm yam nceb qus vim rau qhov yeej muaj ntsis zoo tib yam li tej nceb ntau yam uas noj tau thiab.

Kristy Barbara uas yog ib tug neeg nyob ntawm Sydney yeej tseem nco txog cov kev mus de nceb qus nrog nws pog thaum nws tseem yog ib tug me nyuam yaus.

Ms Barbara hais tias ''Kuv tseem nco thaum kuv tseem yau tias kuv pog yeej tau ib txwm coj kus thiab kuv tej viv ncaus peb mus de nceb qus. Thiab nws yeej ib txwm coj peb mus de ntawm Altona ntawm xeev Victoria.''

Nws hais ntxiv tias ''Kuv pog yeej tau tsiv teb tsaws chaw ntawm teb chaws Malta tuaj nyob ntawm Australia no rau yav lig lub caij xyoo 1940, thiab nws pom tias cov kev mus de nceb qus yog tej yam lom zem heev rau lub caij ntau xyoo thaum ntseem ntxov uas tau tuaj rau teb chaws Australia.''

Tsis tas li ntawd, los cov kev de nceb qus no yeej muaj feem cuam tshuam txog qee cov neeg tsiv teb tsaws chaw cov kev xav thiab tej kab lis kev cai, thiab yog tej yam uas tej tsev neeg thiab tej phooj ywg koom ua ke, los sis yog ib co kev nrhiav zaub noj.

Diego Bonetto ces yog ib tug neeg qhia tej neeg nrhiav nceb qus (Foraging Instructor) ntawm lub tuam chav Forestry New South Wales (Forestry Corporation of NSW).

Nws hais tias xeev New South Wales (NSW) yeej tso cai rau tej neeg mus de nceb qus ntawm nws lub xeev no tej hav zoov.

Ib tug kws kawm txog thiab paub zoo txog nceb txheeb cov nceb Laccaria fungi ntawm thaj hav zoov chaw sov uas huab cua txias. Credit: Jason Edwards/Getty Images

Mr Bonetto tshab txhais tias "Yeej muaj tej nceb qus uas noj tau nyob thoob Australia, thiab muaj ib co uas yeej muaj neeg nyiam noj dua thiab tau coj los cog li neeg Polish tej nceb ntoo thuv (pine mushrooms), neeg Russia los yog neeg Italy tej nceb, thiab yeej muaj tej neeg cog muag.''

Professor Brett Summerell ces yog tus coj sab Science, Education thiab Conservation ntawm lub koom haum Australian Institute of Botanical Science, ntawm Sydney lub vaj Botanic Gardens.

Nws hais tias cov kev txheeb ntau yam nceb uas noj tau ntawm Australia no yuav tau siv cov kev xyuam xim ceev faj thiab cov kev paub txog tej nceb no zoo.

Professor Summerell tshab txhais tias ''Cov kev phom sij ntawm ib txhia nceb uas muaj ntawm teb chaws Australia no ces tej zaum kuj yuav txawv zog tej uas tej zaum koj pom rau lwm cheeb tsam hauv ntiaj teb no. Ib txhia ces yog cov muaj taug heev, thiab ib txhia ces kuj muaj tej ntxhiab tsw heev...thiab tej yam ces tej zaum kuj yuav muaj tej taug ua rau yus qaug sab heev li. Nws thiaj hais ntxiv tias, yog tias yus tsis paub tseeb tias yog hom nceb twg thaum yus mus yos nceb qus, ces qhov zoo tshaj plaws ces tsis txhob kov zoo dua.''

Cov nceb Death cap mushroom

Professor Summerell los kuj yog ib tug kws paub zoo txog tej kab mob muaj rau tej nroj tsuag xyoob ntoo thiab kuj yog ib tug kws paub zoo txog tej nceb thiab yeej tau pab txheeb thiab piav txog tej nceb ntau tshaj 120 hom thiab yeej tau sau tej zaj xov xwm thiab tej phau ntawv txog tej nceb ntau tshaj 150 tsab los yog phau lawm.

Nws hais tias muaj ib txhia neeg ces kuj tu siab heev uas tau tas sim neej ntawm Australia ntau xyoo tsis ntev los no lawm vim noj tau tej nceb yuam kev.

Nws ceeb toom tias ''yog ib tug twg noj tau cov nceb Deth Cap yuam kev, ces tej zaum tus neeg ntawd kuj yuav tas sim neej tau...tab sis kuj yuav ua rau muaj teeb meem ntau yam txij li yuav tau phais hloov siab tshiab [mus txog rau ua rau muaj lwm yam kev mob nkeeg loj sib chab sib chaws tau thiab]''.

Source: Moment RF / Simon McGill/Getty Images

Thiab yeej tau muaj cov kev kwv yees lawm tias muaj tej nce txog li ntawm 250,000 hom ntawm teb chaws Australia no.

Professor Summerell hais tias ces thiaj ua rau cov kev txheeb tej nceb muaj taug no mas yuav tsum yog ib co hauj lwm uas tej neeg muaj txuj ci thiab paub zoo tsi ntsees txog tej nceb no ua cov txheeb xwb.

'Txheeb tau tej nceb no yuaj heev'

Cov kev txheeb seb puas yog cov nceb muaj taug hu ua Death Cap no mas yog tej yam nyuaj heev vim rau qhov tej nceb no yeej zoo muaj ntsis sib xws li tej nceb qus lwm yam uas noj tau thiab.

Thiab yeej muaj cov nceb Death Cap no ntawm xeev Tasmania (TAS), Victoria (VIC), South Australia (SA) thiab Australian Capital Territory (ACT).

Professor Summerell thiaj tshab txhais tias ''Yeej muaj ib co nceb qus ib txwm muaj ntawm lub teb chaws no uas muaj ntsis zoo li cov nceb oyster, hais tsis ntsees rau cov nceb dab (ghost mushroom), thiab yeej yog ib cov nceb nyaum heev thiab yog ho noj tau ces tej zaum kuj yuav ua rau xeev siab ntuav, raws plab, mob plab thiab tej zaum thaum kawg ces kuj yuav raug xa mus kho ntawm tsev kho mob los kuj tau.''

Ntawm xeev Tasmania ces cov nceb yeej paub tias cov nceb Cortinarius eartoxicus yuav ua rau raum tsis ua hauj lwm uas yuav tau ua rau tus neeg noj tau tej nceb no yuav tsum tau mus lim dej thiab lim ntshav.

Tsis tas li ntawd los kuj muaj ntau yam nceb sib xws li ntawd ntawm xeev Victoria thiab, txawm li cas los zoo li yeej tseem tsis tau txheeb tau kiag thiab.

Yog li ntawd, thiaj tsis muaj ib yam twg tsi ntsees ntawm ib yam nceb twg uas yuav qhia tau rau yus tias yog yam nceb noj tau.

Mr Summerell thiaj taw qhia ntxiv tias kom tsis txhob de tej nceb uas tab tom lwj lawm.

Nws hais tias ''Cov kev xyuas kom tej nceb tseem zoo noj yog tej yam tseem ceeb heev. Yog tias hom nceb ntawd twb pib lwj lawm, ces tej zaum kuj yuav muaj kab mob bacteria ua mob rau hauv yus lub plab thiab yuav ua rau yus mob plab raws plab thiab.''

Thiaj yog tej yam tseem ceeb uas xav kom coj ib tug kws paub nceb nrog yus mus yos nceb tom hav zoov.

Mushroom - Pixabay Source: Pixabay

Lub caij mus de nceb qus tom hav zoov

Tej huab cua txias zog thiab ntuj los nag zog yog lub caij uas muaj tej nceb tuaj rau tom hav zoov.

Mr Bonetto thiaj tau tshab txhais tias ''Lub caij muaj nceb ces peb txij lub lub 3 hlis ntuj nrab mus txog lub 6 hli ntuj nrab, tsuas nyob rau ntawm seb tej huab cua zoo li cas thiab seb nyob rau thaj chaw twg xwb.''

Nws hais tias ''ntawm xeev Victoria no ces kuj pib muaj lub caij nceb tuaj ib nyuag ntxov zog, hos nyog ntawm NSW [thiab SA] ces kuj pib tuaj ib nyuag lig zog.''

Muaj tej cai siv sib txawv ntawm ib lub xeev twg

Mr Bonetto thiaj hais tias ib lub xeev twg ntawm Australia no nyias yeej muaj nyias tej cai los tswj cov kev mus de nceb qus, thiab yog tej yam tseem ceeb heev uas yuav tau pob txog tej cai no ua ntej yuav mus de nceb rau tom hav zoov.

''Ntawm NSW ces peb yeej tso cai rau tej neeg mus de tau tej nceb ntoo thuv (pine mushrooms) ntawm tej hav zoov, tab sis lwm lub xeev ces tsis pub.''

“Ntawm Western Australia (WA) ces yeej tsis pub yus mus de nceb qus li tsis hais yog tej nceb ib txwm muaj ntawm lub xeev ntawd los yog tej nceb qus zoo nkauj hlo li. Hos ntawm SA ces yeej tsis pub de li thiab; hos ntawm xeev Victoria los kuj yeej tsis pub de thiab.

Cov nceb Gilled Fungi, Amanita Ochrophylla, nyob hauv pem teb ntawm ib thaj hav zoov. Credit: Jason Edwards/Getty Images

Ntawm Queensland ces yuav tsum mus thov ntawv tso cai ntawm lub xeev no tej national parks, state forests los yog lwm cov chaw uas ceev txuag tsis pub txov. Tej chaw no yeej muaj cai nruj tswj li yog yuav mus ces yuav tsum tau qhia rau tej neeg saib xyuas thaj hav zoov uas yus xav mus xyuas ntawd paub.

Mr Bonetto tshab txhais tias ''Yog tias yus muaj yus ib thaj teb los yog yus ib tug phooj ywg uas muaj ib thaj teb ces yus kuj muaj peev xwm mus de nceb qus tau yam tsis tas thov kev tso cai dab tsi los yog tsis tas ua raws ib co cai dab tsi li.''

Yog tias zaj xov xwm kaw ua suab no ho ua rau koj muaj kev txhawj xeeb txog koj txoj kev noj qab haus huv los yog ib tug neeg koj paub ho tau noj tej nceb muaj taug, ces tsis hais koj yuav nyob qhov twg ntawm teb chaws Australia no li xav kom hu rau lub koom haum Poisons Information Centre tus xov tooj 131 126.

Thiab yog tias ho muaj tej xwm txheej mob uas yuav ua rau muaj kev phom sij rau koj txoj sia, ces hu rau tus xov tooj Triple Zero (000).

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.