ཨོ་སི་ཊོ་ལི་ཡའི་གདོད་མའི་མི་རིགས་ཨ་བྷོ་རི་ཇི་ནར་དང་ཐོ་རི་སི་གླིང་ཕྲན་གྱི་མི་རྣམས་ཨོ་སི་ཊོ་ལི་ཡའི་རྩ་ཁྲིམས་ནང་ངོས་འཛིན་མེད་པ་ཁྱེད་ཀྱིས་ཤེས་ཀྱི་ཡོད་དམ།
ཨོ་སི་ཊོ་ལི་ཡའི་“གདོད་མའི་མི་རིགས་ཀྱིས་གྲོས་ཚོགས་ལ་བཏོན་པའི་དགོས་འདུན་འབོད་སྒྲ་”དེ་ཨོ་སི་ཊོ་ལི་ཡའི་རྩ་ཁྲིམས་ནང་བཀོད་དགོས་མིན་ཐད། ཨོ་སི་ཊོ་ལི་ཡ་གཞུང་གིས་མི་མང་གིས་མང་མོས་འོས་བསྡུའི་ལམ་ནས་ཐག་གཅོད་ཅིག་བྱ་རྒྱུ་འབོད་སྐུལ་བྱས་ཡོད་པ་རེད།
ཡང་སྙིང་མི་མང་གི་མང་མོས་འོས་བསྡུ་དེ་ག་རེ་ཡིན་མིན་དང་། ཨོ་སི་ཊོ་ལི་ཡའི་ནང་སུ་ཞིག་གིས་འོས་ཤོག་དེ་འཕེན་པའི་ཐོབ་ཐང་ཡོད་མེད། གྲོས་ཚོགས་ལ་ཕུལ་བའི་འབོད་སྒྲ་དེ་ག་རེ་རེད་དམ།
ཨོ་སི་ཊོ་ལི་ཡའི་མཉམ་འབྲེལ་སྲིད་གཞུང་གིས་ཐོབ་ཐང་ཡོད་པའི་མི་མང་རྣམས་ལ་གདོད་མའི་མི་རིགས་རྣམས་ཀྱིས་གྲོས་ཚོགས་ལ་ཕུལ་བའི་དགོས་འདུན་འབོད་སྒྲ་དེ་འཐུས་ཚབ་ཚོགས་ཆུང་ཞིག་བརྒྱུད་ཨོ་སི་ཊོ་ལི་ཡའི་རྩ་ཁྲིམས་བཟོ་བཅོས་རྒྱག་ནས་རྩ་ཁྲིམས་ནང་བཀོད་དགོས་མིན་ཐད་འོས་ཤོག་གི་ལམ་ནས་ཐག་གཅོད་བྱེད་དགོས་པའི་འབོད་སྐུལ་བྱས་ཡོད།
“དགོས་འདུན་འབོད་སྒྲ་”དེ་བཞིན་འོས་འདེམས་བྱས་པའི་ཚོགས་ཆུང་གིས་གནད་དོན་དེའི་ཐོག་གཞུང་ལ་ལམ་སྟོན་དང་ཁྲིམས་ལུགས་དེའི་ཐོག་ནས་མི་རིགས་དང་པོའི་ཚོའི་འཚོ་བའི་གནད་དོན་ལ་ཤུགས་རྐྱེན་དང་འགྱུར་བ་ཐེབས་རྒྱུ་ཡིན་པ་རེད།
ཨེ་ཝན་ཨེ་ཁེན་སི་མི་ཐི་ Evan Ekin-Smyth ལགས་ནི་རྒྱལ་ཡོངས་ཀྱི་རང་དབང་ལྡན་པའི་འོས་བསྡུ་བྱེད་མཁན་ཨོ་སི་ཊོ་ལི་ཡའི་འོས་བསྡུ་ལྷན་ཁང་ AEC ཡི་མགྲིན་ཚབ་པ་ཞིག་རེད།
ཁོང་གིས་མི་མང་གི་བསམ་ཤོག་འོས་བསྡུ་དེ་ནི་གནས་ཚུལ་བྱེ་བྲག་པ་ཞིག་ཨོ་སི་ཊོ་ལི་ཡའི་རྩ་ཁྲིམས་ནང་འགྱུར་བ་གཏོང་དགོས་འདུག་གམ་མི་འདུག་ཅེས་རྒྱལ་ཡོངས་སུ་མི་མང་འོས་བསྡུ་བྱ་རྒྱུ་རེད། རྩ་ཁྲིམས་འགྱུར་བ་གཏོང་བར་ཐབས་ལམ་གཅིག་རང་ཡོད་པ་ནི་མི་མང་འོས་བསྡུ་བྱ་རྒྱུ་དེ་རེད། གྲོས་ཚོགས་ལ་དེ་འདྲའི་འགྱུར་བ་གཏོང་རྒྱུར་དབང་ཚད་ཡོད་པ་མ་རེད་ཅེས་གསུངས་འདུག
ཨོ་སི་ཊོ་ལི་ཡའི་རྩ་ཁྲིམས་ནི་ཨོ་སི་ཊོ་ལི་ཡ་མཉམ་འབྲེལ་སྲིད་གཞུང་གི་ལས་དོན་གང་འདྲ་བྱེད་དགོས་མིན་དང་། དེ་ནི་ཀོ་མོན་ཝལ་ཐི་ Commonwealth ཞེས་དབྱིན་ཇིའི་རྒྱལ་ཕྲན་མཉམ་འབྲེལ་གྱི་སྲིད་དབང་ལམ་ལུགས་དང་། མངའ་སྡེ། མི་མང་བཅས་གཞིར་བཞག་ནས་གཏན་འབེབས་དང་། དེའི་ནང་མངའ་སྡེ་དང་དབུས་གཞུང་གི་གྲོས་ཚོགས་ནས་ཁྲིམས་ལུགས་ག་རེ་བཟོ་ཆོག་གི་ཡོད་མེད་གསལ་ཡོད།
མི་མང་རྣམས་ལ་གཤམ་གྱི་དྲི་བ་དེའི་ཐོག་ནས་རྒྱབ་སྐྱོར་དང་མོས་མཐུན་ཡོད་ Yes དང་རྒྱབ་སྐྱོར་དང་མོས་མཐུན་མེད་ No ཅེས་དྲི་བར་ལན་འདེབས་དགོས་ཀྱི་ཡོད་པ་རེད།
“གྲོས་གཞི་བཏོན་པའི་ཁྲིམས་དེའི་ནང་། རྩ་ཁྲིམས་སྒྱུར་བཅོས་བཏང་ནས་ཨོ་སི་ཊོ་ལི་ཡའི་མི་རིགས་དང་པོ་ཨ་བྷོ་རི་ཇི་ནལ་དང་ཐོ་རེ་སི་གླིང་ཕྲན་གྱི་མི་རྣམས་ཀྱི་དགོས་འདུན་འབོད་སྒྲ་རྩ་ཁྲིམས་ནང་ངོས་འཛིན་བྱ་རྒྱུ།” ཡི་གྲོས་གཞི་དེར་ཁྱེད་ཀྱིས་མོས་མཐུན་ཡོད་དམ་”ཞེས་བཀོད་ཡོད།
ཨོ་སི་ཊོ་ལི་ཡའི་འོས་བསྡུ་ལྷན་ཁང་ AEC ཡི་མགྲིན་ཚབ་པ་ཨེ་ཝན་ཨེ་ཁེན་སི་མི་ཐི་ Evan Ekin-Smyth ཡིས་བསམ་ཤོག་འོས་བསྡུ་དེ་གྲུབ་འབྲས་ཐོན་པར་ངེས་པར་དུ་མང་མོས་ཉིས་ལྡབ་ཀྱི་རྒྱབ་སྐྱོར་དགོས་ཀྱི་ཡོད་སྐོར་འགྲེལ་བརྗོད་གནང་འདུག
མི་མང་གི་བསམ་ཤོག་འོས་བསྡུ་དེ་རྒྱལ་ཁ་ཐོབ་པར་མངའ་སྡེ་མང་ཆེ་བ་དང་རྒྱལ་ཡོངས་སུ་རྒྱབ་སྐྱོར་དང་མོས་མཐུན་ཡོད་ Yes ཞེས་མང་མོས་རྒྱབ་སྐྱོར་ཐོབ་དགོས་ཀྱི་ཡོད་པ་རེད། མ་མཐའ་ཡང་ཨོ་སི་ཊོ་ལི་ཡའི་མངའ་སྡེ་དྲུག་ནང་ནས་མངའ་སྡེ་བཞིའི་ནང་རྒྱབ་སྐྱོར་ Yes མང་མོས་དགོས་ཀྱི་ཡོད་པ་དང་། ཨོ་སི་ཊོ་ལི་ཡའི་རྒྱལ་སའི་མངའ་ཁུལ་དང་བྱང་ཕྱོགས་ས་ཁུལ་བཅས་ནས་ཀྱང་ཨོ་སི་ཊོ་ལི་ཡའི་མངའ་སྡེ་གཞན་ལྟར་མི་མང་ཚོས་རྒྱབ་སྐྱོར་ཡོད་ Yes དང་རྒྱབ་སྐྱོར་མེད་ No ཅེས་འོས་ཤོག་འཕེན་དགོས་ཀྱི་ཡོད་པ་རེད། ས་ཁུལ་དེ་གཉིས་ཀྱི་འོས་ཤོག་ནི་རྒྱལ་ཡོངས་ཀྱི་མང་མོས་འོས་ཤོག་ཕྱོགས་སུ་བརྩི་དགོས་ཀྱི་ཡོད་པས། མངའ་ཁུལ་དང་ས་ཁུལ་དེ་གཉིས་ཀྱི་འོས་ཤོག་ཀྱང་གལ་ཆེན་པོ་ཆགས་ཡོད་པ་རེད་ཅེས་གསུངས་འདུག
གྲོས་ཚོགས་ལ་བཏོན་པའི་གྲོས་གཞི་དེའི་ནང་ཕོ་མོ་དོ་མཉམ་ཡིན་པའི་གདོད་མའི་མི་རིགས་ཀྱི་སྐུ་ཚབ་ཚོགས་ཆུང་ཞིག གདོད་མའི་མི་རིགས་ཀྱི་ཚོགས་སྡེ་ཁག་གི་བདམས་ནས། ཚོགས་ཆུང་དེས་གདོད་མའི་མི་རིགས་ཀྱི་ཚབ་བྱས་ནས་གྲོས་ཚོགས་ལ་གདོད་མའི་མི་རིགས་ལ་ཕན་ནུས་ལྡན་པའི་ཁྲིམས་ལུགས་ཟིན་བྲིས་ལམ་སྟོན་བྱ་རྒྱུ་ཡིན་པ་རེད།
སློབ་དཔོན་མེ་གྷན་ཌ་ཝེ་སི་ Megan Davis ལགས་ནི་ཨོ་སི་ཊོ་ལི་ཡའི་གདོད་མའི་མི་རིགས་ཨ་བྷོ་རི་ཇི་ནལ་གྱི་མི་རིགས་ཤིག་ཡིན་པ་དང་། ཁོ་མོ་ནི་ནིའུ་སའོ་ཐི་ཝལ་མངའ་སྡེའི་གཙུག་ལག་སློབ་གཉེར་ཁང་གི་རྩ་ཁྲིམས་ཁྲིམས་ལུགས་སྐོར་གྱི་ཚོགས་གཙོ་ཞིག་རེད། མ་ཚད་ཁོ་མོ་ནི་ཨ་བྷོ་རེ་ཇི་ནལ་དང་ཐོ་རི་སི་གླིང་ཕྲན་གྱི་མི་རྣམས་ཀྱི་དགོས་འདུན་འབོད་སྒྲ་དེ་ངོས་འཛིན་གྱིས་རྩ་ཁྲིམས་ནང་བཅུག་རྒྱུའི་སྐོར་གྱི་ཆེད་མཁས་མི་སྣའི་ཚོགས་མི་ཤིག་ཀྱང་རེད།
ཁོ་མོས་རྒྱལ་ཁབ་གཞན་དེ་འདྲའི་ནང་འདི་དང་ཆ་འདྲ་བའི་གནས་ཚུལ་གྲོས་གཞི་དེ་འདྲ་གྲུབ་འབྲས་ལྡན་པ་བྱུང་ཡོད་སྐོར་འགྲེལ་བརྗོད་བྱས་འདུག
ཁོ་མོས་འདི་ནི་སྤྱི་སྟངས་ཀྱི་སྒྱུར་བཅོས་ཤིག་སྟེ་འཛམ་གླིང་གི་མང་གཙོའི་ལམ་ལུགས་ནང་རྒྱུན་དུ་མཐོང་རྒྱུ་ཡོད་པ་ཞིག་རེད། དེ་ཡང་གདོད་མའི་མི་རིགས་ཀྱི་མི་རྣམས་ཀྱིས་གཞུང་གི་ཁོང་ཚོའི་སྐོར་ཁྲིམས་དང་སྲིད་བྱུས་བཟོ་སྐབས་འབོད་སྒྲ་དེ་ཐོས་ཐུབ་པའི་ཆེད་དུ་ཡིན།
ང་ཚོས་ཨོ་སི་ཊོ་ལི་ཡའི་ནང་སྐྱོན་ཆའི་བར་སྟོང་ཞིག་བསྐངས་མ་ཐུབ་པའི་རྒྱུ་མཚན་གཅིག་ནི་གཞུང་གིས་གདོད་མའི་མི་རིགས་སྐོར་ཁྲིམས་དང་སྲིད་བྱུས་བཟོས་སྐབས། གདོད་མའི་མི་རིགས་ཀྱི་སྤྱི་ཚོགས་དང་གོ་བསྡུར་བློ་འདྲི་ཧ་ཅང་ཉུང་དྲག་པའི་རྐྱེན་གྱིས་བྱུང་བ་རེད་ཅེས་གསུངས་འདུག
ཌན་པཱར་ཀེན་ Dean Parkin ལགས་ནི་ཨོ་སི་ཊོ་ལི་ཡའི་གདོད་མའི་མི་རིགས་ཨ་བྷོ་རི་ཇི་ནལ་གྱི་ནང་གསེས་ཁོན་ཌ་མོ་ཁེ་ Quandamooka ཞེས་པའི་མི་རིགས་དེ་རེད། ཁོང་ནི་ཨུ་ལུ་རུའི་སེམས་ནང་གི་བསྒྲགས་གཏམ་སྤེལ་མཁན་དང་གྲོས་ཚོགས་ལ་ཕུལ་བའི་འབོད་སྒྲའི་ལས་འགུལ་འགན་འཛིན་ཞིག་ཀྱང་རེད།
ཁོང་གིས་འབོད་སྒྲ་དེས་ཨོ་སི་ཊོ་ལི་ཡའི་མི་རིགས་དང་པོ་རྣམས་ལ་རང་ཐག་རང་གཅོད་ཀྱི་ཚད་གཞི་ངེས་ཅན་ཞིག་ལ་སླེབས་པར་ཕན་ཐོགས་ཡོད་པ་དང་། ཨོ་སི་ཊོ་ལི་ཡ་གཞུང་གི་ངོས་ནས་ཀྱང་གདོད་མའི་མི་རིགས་ཀྱི་སྤྱི་ཚོགས་ལ་འཕྲད་བཞིན་པའི་དཀའ་ངལ་ལ་ཆ་རྒྱུས་ཡག་ཤོས་ཡོད་མཁན་གྱི་མི་རྣམས་ཀྱི་བསམ་འཆར་ཉན་དགོས་པ་རེད་ཅེས་གསུངས་འདུག
ཁོང་གིས་ཨ་བྷོ་རི་ཇི་ནལ་དང་ཐོ་རེ་སི་གླིང་ཕྲན་གྱི་ཆེད་མཁས་མི་སྣ་བགྲོ་གླེང་ལ་བསུས་ཚེ་ད་གཟོད་གཞུང་དང་གྲོས་ཚོགས་ཀྱིས་ཁྲིམས་དང་སྲིད་བྱུས་ཡག་པོ་ཞིག་བཟོ་ཐུབ་རྒྱུ་མ་ཟད། གྲུབ་འབྲས་བཟང་པོ་ཞིག་ལ་འབབ་ཐུབ་ཀྱི་རེད་ཅེས་གསུངས་འདུག
ཡིན་ན་ཡང་ཨོ་སི་ཊོ་ལི་ཡའི་གདོད་མའི་མི་རིགས་ནང་ལ་ཡང་ཆབ་སྲིད་ཀྱི་ལྟ་ཚུལ་སྣ་ཚོགས་བཟུང་མཁན་ཡོད་ཅིང་། གདོད་མའི་མི་རིགས་ཀྱི་ཆབ་སྲིད་པ་ཁག་ཅིག་གིས་ད་ཐེངས་ཀྱི་གྲོས་ཚོགས་ལ་ཕུལ་བའི་འབོད་སྒྲ་དེ་ལ་མོས་མཐུན་བྱེད་ཀྱི་མེད་པ་རེད།
ཨོ་སི་ཊོ་ལ་ཡའི་བྱང་ཕྱོགས་མངའ་ཁུལ་ནས་གུ་ཡངས་ཚོགས་པའི་གྲོས་ཚོགས་གོང་མའི་འཐུས་མི་ཇཱ་ཤེ་ཏཱ་ཕེ་རེ་སེ་དང་སྔོན་མ་ངལ་རྩོལ་ཚོགས་པའི་འགོ་ཁྲིད་ཝ་རན་མུ་ཌན་སོགས་ནི་གྲོས་ཚོགས་ལ་ཕུལ་བའི་འབོད་སྒྲ་དེ་ལ་རྒྱབ་སྐྱོར་མེད་ No ཅེས་ལས་འགུལ་སྤེལ་མཁན་གྱི་གྲས་སུ་ཡོད་པ་རེད། ཁོང་ཚོས་གྲོས་ཚོགས་ལ་ཕུལ་བའི་འབོད་སྒྲ་དེས་མ་འོངས་པར་གདོད་མའི་མི་རིགས་རྣམས་ལ་ཕན་ཐོགས་ཆེན་པོ་མེད་སྐོར་བརྗོད་བཞིན་ཡོད།
ལོ་རྒྱུས་ནང་བལྟས་ན། ཨོ་སི་ཊོ་ལི་ཡའི་མི་རྣམས་ཀྱིས་རྩ་ཁྲིམས་བཟོ་བཅོས་རྒྱག་རྒྱུ་ནི་ལས་སླ་མོ་ཞིག་མ་རེད། ཕྱི་ལོ་ ༡༩༠༡ ཨོ་སི་ཊོ་ལི་ཡ་སྤྱི་མཐུན་མཉམ་འབྲེལ་སྲིད་གཞུང་དབུ་བརྙེས་པ་ནས་བཟུང་རྩ་ཁྲིམས་འགྱུར་བ་གཏོང་རྒྱུའི་གྲོས་གཞི་ཐེངས་ ༤༤ ནང་ ༨ ཁོ་ན་མ་གཏོགས་འགྱུར་བ་གྲུབ་འབྲས་ཐོན་ཐུབ་མེད་པ་རེད།
གདོད་མའི་མི་རིགས་ཀྱི་གནད་དོན་ཐོག་མང་མོས་འོས་བསྡུ་ཐེངས་དང་པོ་དེ་ཕྱི་ལོ་ ༡༩༦༧ ལོར་བྱས་ཤིང་། སྐབས་དེར་ཨོ་སི་ཊོ་ལི་ཡའི་མི་རིགས་དང་པོ་རྣམས་ཨོ་སི་ཊོ་ལི་ཡའི་ཀོ་མོན་ཝལ་ཐི་ Commonwealth དབྱིན་ཇིའི་རྒྱལ་སྲིད་ལམ་ལུགས་འོག་མི་འབོར་གྲངས་བཤེར་གྱི་གྲངས་ཁོངས་སུ་བཅུགས་ཡོད།
མ་འོངས་པར་མང་མོས་འོས་བསྡུ་དེའི་ཐོག་ཁྱེད་རང་གི་འོས་བསྡུ་ཤོག་གུའི་ཐོག་དབྱིན་ཡིག་ནང་ Yes དང་ཡང་ན་ No ཞེས་འབྲི་དགོས་ཀྱི་ཡོད་པ་རེད།
ཕེ་ཊི་ཀལ་ནན་ Pat Callanan ལགས་ནི་ཨོ་སི་ཊོ་ལི་ཡ་འོས་བསྡུ་ལྷན་ཁང་གི་སྐུ་ཚབ་ཅིག་རེད། ཁོང་གིས་འོས་བསྡུ་སྐོར་གྱི་གནས་ཚུལ་མང་པོ་ཞིག་སྐད་ཡིག་འདྲ་མིན་ནང་ཡོད་སྐོར་བརྗོད་འདུག
ཁོང་གིས་ང་ཚོས་འོས་བསྡུ་སྐོར་སྐད་ཡིག་ ༣༠ ཙམ་གྱི་ནང་ཡིག་སྒྱུར་བྱ་རྒྱུ་ཡིན་པས་དེ་དག་དྲ་ཚིགས་ཐོག་བལྟ་ཀློག་བྱ་རྒྱུ་ཡོད་པ་མ་ཟད། ཁ་པར་ཐོག་སྐད་སྒྱུར་སོགས་ཀྱི་ཞབས་ཞུ་ཀྱང་ཡོད་སྐོར་བརྗོད་འདུག
གལ་སྲིད་ཁྱེད་རང་དེ་སྔོན་ཨོ་སི་ཊོ་ལི་ཡའི་འོས་བསྡུ་ནང་ཆ་ཤས་བླངས་མྱོངས་ཡོད་ཚེ། ཐེངས་འདིར་ཡང་མང་མོས་འོས་བསྡུ་ནང་འཛུལ་ཞུགས་བྱ་རྒྱུའི་ཆ་རྐྱེན་ཚང་ཡོད་པ་དང་། ད་ཐེངས་ཀྱི་མང་མོས་འོས་བསྡུ་ནང་ཆ་ཤས་ངེས་པར་དུ་བླངས་དགོས་པའི་གཏན་འབེབས་ཤིག་ཡིན་པ་རེད།
ཁྱེད་རང་ཨོ་སི་ཊོ་ལི་ཡའི་མི་སེར་ཞིག་ཡིན་པ་ཙམ་གྱིས་འོས་བསྡུའི་ཆ་ཤས་བླངས་དགོས་ཀྱི་ཡོད་ཀྱང་། གལ་སྲིད་ཁྱེད་རང་ས་ཆ་གཞན་ལ་སྤོ་འགྲོ་བའམ། ཡང་ན་ཁྱེད་རང་གི་འོས་བསྡུའི་དེབ་སྐྱེལ་བྱས་ཚར་ཡོད་མེད་སོགས་དྲ་ཚིགས་ aec.gov.au ཐོག་ནས་ཞིབ་འཇུག་བྱེད་ཐུབ་ཀྱི་ཡོད་སྐོར་བརྗོད་འདུག
སྐུ་ཞབས་ཨེ་ཁེན་སི་མི་ཐི་ Mr Ekin Smyth ལགས་ཀྱིས་ད་ཐེངས་ཀྱི་གནད་དོན་དེའི་སྐོར་བགྲོ་གླེང་དང་སོ་སོ་རང་ངོས་ནས་ཀྱང་ཞིབ་འཇུག་བྱེད་དགོས་པ་དེ་གལ་ཆེན་པོ་རེད་ཅེས་གསུངས་འདུག
