མེ་འཕེན་མཚམས་འཇོག་དགོས་པའི་རྒྱལ་སྤྱིའི་གནོན་ཤུགས་ལ་དབྱི་ཟི་རལ་གྱིས་མོས་མཐུན་བྱས་མེད་པས་མ་ཚད། ད་ལྟའི་ཆར་དབྱི་ཟི་རལ་གྱིས་གྷ་རྫ་གྲོང་ཁྱེར་དེ་མཐའ་སྐོར་ནས་པཱ་ལེ་སི་ཐན་དེ་ས་ཁུལ་ཁག་གཉིས་ལ་དུམ་བུ་བཏང་ཡོད་པ་རེད།
ཨ་རིའི་རྒྱལ་དོན་དྲུང་ཆེ་ཨན་ཐོ་ནིང་བྷེན་ཁན་ Anthony Blinken གྱིས་མུ་མཐུད་དཀྱིལ་ཤར་ས་ཁུལ་ལ་ཕྱི་འབྲེལ་འཛུགས་རྒྱུར་འབད་བརྩོན་བྱེད་བཞིན་ཡོད་པ་དང་། ད་ལྟའི་དབྱི་ཟི་རལ་དང་པཱ་ལེ་སི་ཐན་གཉིས་དབར་གྱི་ཛ་དྲག་གནས་ཚུལ་དེ་ཁྱིམ་མཚེས་རྒྱལ་ཁབ་ལེ་བྷ་ནོན་ལ་མཆེད་སྲིད་པའི་ཉེན་འཚབ་སླེབས་ཡོད།
གྲོང་ཁྱེར་གྷ་རྫ་ནས་ཐོན་ཐུབ་པའི་ཨོ་སི་ཊོ་ལི་ཡའི་མི་སེར་ ༡༢ ཙམ་ཚོང་ལས་གནམ་གྲུར་ཞུགས་ཏེ་ཉེ་ཆར་ཕྱི་ཟླ་ ༡༡ ཚེས་ ༥ རེས་གཟའ་ཉི་མའི་ཉིན་ཨོ་སི་ཊོ་ལི་ཡའི་གྲིང་ཁྱེར་སིཌ་ནང་ལ་འབྱོར་ཡོད་པ་དང་། མ་ཚད་རེས་གཟའ་སྤེན་པའི་ཉིན་ཨོ་སི་ཊོ་ལི་ཡའི་ལྷོ་ཕྱོགས་མངའ་སྡེའི་རྒྱལ་ས་ Adelaide ལ་ནང་མི་ ༤ ཅན་ཞིག་དང་། ཡང་གྲོང་ཁྱེར་མེལ་བྷོན་ལ་ནང་མི་གསུམ་ཅན་ཞིག་འབྱོར་ཡོད་པ་རེད།
ཕྱིར་ཨོ་སི་ཊོ་ལི་ཡར་འབྱོར་བའི་བཟའ་ཚང་ཞིག་གིས་བདུན་ཕྲག་འགའ་ཤས་རིང་ཧ་ཅང་དངངས་སྐྲག་འོག་ལ་སྡོད་དགོས་བྱུང་ཡང་ད་ནས་ཞེད་སྣང་བྱེད་མི་དགོས་པ་ཆགས་སོང་ཞེས་གསུངས་འདུག
ང་ཚོ་བདུན་ཕྲག་གསུམ་ཙམ་གྱི་རིང་རྨི་ལམ་ནང་ལ་ཡང་དངངས་སྐྱེས་བྱུང་། སྐབས་དེར་ང་ཚོས་ལས་ཀ་བྱེད་ཐུབ་ཀྱི་མི་འདུག་ལ། ཁ་ལག་ཀྱང་བཟའ་ཐུབ་ཀྱི་མི་འདུག ང་ཚོ་ཕྱིར་ལ་ཡང་ཐོན་ཐུབ་ཀྱི་མི་འདུག ཨོ་སི་ཊོ་ལི་ཡ་གཞུང་དང་ཕྱི་འབྲེལ་ལྷན་ཁང་ནས་ང་ཚོར་རོགས་རམ་གནང་བྱུང་བས་ཐུགས་རྗེ་ཆེ་ཞུ་རྒྱུ་ཡིན། མ་ཚད་གྲོས་ཚོགས་ནང་ཡོད་པའི་འཐུས་མི་ཁག་ཅིག་གིས་ཀྱང་།སདབྱི་ཟི་རལ་དང་། དབྱི་ཇིབ་གཞུང་སོགས་ལ་གྲོས་མོལ་གྱིས་ང་ཚོར་རྒྱབ་སྐྱོར་ཆེན་པོ་གནང་བྱུང་བས་ཁོང་ཚོ་ལའང་རྗེས་སུ་ཡི་རངས་ཞུ་རྒྱུ་ཡིན་ཞེས་གསུངས་འདུག
བདུན་ཕྲག་སྔོན་མར་པཱ་ལེ་སི་ཐན་གྱི་གྲོང་ཁྱེར་རཱ་ཧྥ་བརྒྱུད་གྷ་རྫ་ནས་དབྱི་ཇིབ་ལ་འགྲོ་བསྐྱོད་ཆོག་པ་བྱུང་བའི་ཨོ་སི་ཊོ་ལི་ཡའི་མི་སེར་ ༢༥ ནང་མི་སེར་ ༡༩ ད་ཆ་ཨོ་སི་ཊོ་ལི་ཡར་འབྱོར་ཚར་ཡོད་པ་རེད།
ཨོ་སི་ཊོ་ལི་ཡ་དབུས་གཞུང་གིས་ད་ཆ་དམག་གིས་མཐའ་སྐོར་ཡོད་པའི་གྲོང་ཁྱེར་གྷ་རྫ་ནང་ད་དུང་ཡང་ཨོ་སི་ཊོ་ལི་ཡའི་མི་སེར་དང་། ཨོ་སི་ཊོ་ལི་ཡའི་ནང་གཏན་སྡོད་བྱེད་མཁན། ཁོང་ཚོའི་ནང་མི་སོགས་ཁྱོན་མི་གྲངས་ ༦༧ ཙམ་ལྷག་ཡོད་པ་དེ་དག་ལ་རོགས་རམ་བྱེད་མུས་ཡིན་སྐོར་བརྗོད་འདུག
ཕྱི་ཟླ་ ༡༠ པ་ཚེས་ ༧ ཉིན་ཧཱ་མ་སིས་དབྱི་ཟི་རལ་གྱི་ལྷོ་ཕྱོགས་ས་ཁུལ་ལ་དྲག་རྒོལ་བྱས་སྐབས་དབྱི་ཟི་རལ་གྱི་མི་མང་དཀྱུས་མ་ ༡༤༠༠ ཙམ་བསད་ཡོད་སྐོར་དབྱི་ཟི་རལ་གཞུང་གིས་འགྲེལ་བརྗོད་བྱས་ཡོད་པ་དང་། ཡང་ཧ་མ་སིའི་འཕྲོད་བསྟེན་བློན་ཆེན་གྱིས་དབྱི་ཟི་རལ་གྱིས་དུས་ཡུན་ཟླ་བ་གཅིག་མ་ཟིན་ཙམ་རིང་མེ་སྒྱོགས་འཕེན་ནས་ཁྱོན་པཱ་ལེ་སི་ཐན་གྱི་མི་གྲངས་ ༩༧༠༠ ཙམ་བསད་ཡོད་པ་དང་། དེའི་ནང་ཕྲུ་གུ་ ༤༠༠༠ ལས་མང་བ་བསད་ཡོད་སྐོར་བརྗོད་འདུག
ཨོ་སི་ཊོ་ལི་ཡར་ཕྱིར་འབྱོར་ནས་དེ་སྔོན་གྷ་རྫ་གྲོང་ཁྱེར་ནང་གི་གནས་སྟངས་དངོས་སུ་མཐོང་མཁན་ཚོས། ཨོ་སི་ཊོ་ལི་ཡ་གཞུང་གིས་དམག་འཁྲུག་འཚམས་འཇོག་ལ་རོགས་རམ་གང་ཐུབ་གནང་རྒྱུའི་རེ་སྐུལ་ཞུས་འདུག
ང་ཚོས་རེ་བ་ལ་གྷ་རྫ་ནང་གི་མེ་འཕེན་དེ་མྱུར་དུ་མཚམས་འཇོག་ཡོང་བའི་རེ་བ་རྒྱག་གི་ཡོད། གང་ཡིན་ཟེར་ན། མི་མང་པོ་ཞིག་རྒྱུ་མཚན་མེད་པ་འདས་གྲོངས་སུ་འགྲོ་བཞིན་ཡོད་པ་རེད། མི་རྣམས་ཀྱི་སོ་སོའི་ཕྲུ་གུ་དང་ནང་མི་ཁྱིམ་ཚང་མེད་པ་ཆགས་ནས་སྡུག་བསྔལ་མྱོངས་བཞིན་ཡོད་པ་རེད་ཅེས་གསུངས་འདུག
ཡིན་ན་ཡང་ཨོ་སི་ཊོ་ལི་ཡའི་སྲིད་བློན་ཟུར་པ་སི་ཀོ་ཊི་མོ་རེ་སོན་ Scott Morrison དབྱི་ཟི་རལ་ལ་གཟིགས་སྐོར་ཕྱིན་ནས་དབྱི་ཟི་རལ་ལ་གདུང་སེམས་མཉམ་སྐྱེད་ཡོད་པའི་རྣམ་པ་བསྟན་ཡོད་པ་དང་། དེ་དང་ཆབས་ཅིག་དེ་སྔོན་དབྱིན་ཡུལ་གྱི་སྲིད་བློན་ཟུར་པ་བྷོ་རེས་ཇོན་སོན་ Boris Johnson གྱིས་ཀྱང་ཁོང་གིས་མེ་འཕེན་མཚམས་འཇོག་དགོས་པའི་གནད་དོན་ལ་དེ་ལ་རྒྱབ་སྐྱོར་བྱེད་ཀྱི་མེད་སྐོར་བརྗོད་ཡོད་པ་རེད།
