Muaj neeg Australia yuav laug txog 1 feem peb yog cov yug txawv teb chaws. Nod yog cov teb chaws lawv tuaj.

Txij li xyoo 1891 los ces yeej tsis muaj tej neeg Australia yug txawv teb chaws yuav coob npaum li no li.

Three countries account for more than a third of Australia's overseas-born population. Source: AAP / Jason O'Brien

Ntsiab lus tseem ceeb:

• Muaj neeg Australia txog li ntawm 18.5 million tus yug ntawm Australia no thiab muaj 8.2 million tus yog cov yug txawv teb chaws.
• Muaj tej pej xeem ntawm peb lub teb chaws muaj Australia tej pej xeem sib sau ua ke ntau tshaj ib feem peb ntawm Australia uas yog cov neeg yug txawv teb chaws.
• Kuj tau kwv yees tias muaj txog li 3.6 feem pua ntawm ntiaj teb tej pej xeem yog cov neeg uas tsis nyob ntawm lub teb chaws yug lawv.

Tsis yog txij li lub caij xyoo 1800s los ua muaj neeg Australia uas yog cov neeg yug txawv teb chws nyob ntawm teb chaws no coob.

Tej xov xwm uas lub koom haum Australian Bureau of Statistics (ABS) tau qhia rau hnub zwj Feej (Wednesday) ces pom tias Australia tej pej xeem yug txawv teb chaws yeej muaj txog li 30.7 feem pua rau xyoo 2023 - thiab tau nce tuaj ntxiv ntawm 29.5 feem pua xyoo 2022 lawm.

Thiab txij li xyoo 1891 los ces yeej tsis muaj tej neeg Australia uas yug txawv teb chaws coob npaum no li, thaum uas tau teev txog Australia tej pej xeem no thawj zaug.

Tej neeg Australia uas yug txawv teb chaws yeej tsis muaj coob nplaum li tam sim no yog piv rau 130 xyoo dhau los. Source: SBS

Txawm tias yeej muaj neeg tsiv teb tsaws chaw coob heev txij lub lub caij xyoo 1890s, los tej neeg no kuj muaj tsawg txog li 10 feem pua rau xyoo 1947 xwb vim tsis muaj neeg tsiv teb tsaws chaw rau lub caij tsov rog ntiaj teb zeeg ib, tsov rog ntiaj teb zeeg ob thiab lub caij lagluam tsis zoo (1929).

Txij ntawd los ces mam li tau rov qab muaj tej neeg Australia yug txawv teb chaws coob tuaj ntxiv - thiab tau muaj tus kab mob COVID-19 tau ua rau tej neeg coob tuaj ntxiv tsawg me ntsis lawm xwb.

ABS tau qhia meej tias nws tej xov xwm no yog teev raws cov kev txheeb pej xeem rau lub caij uas tseem tsis tau suav Australia tej neeg txum tim nrog Australia tej pej xeem txog ntua rau xyoo 1971.

Muaj neeg coob npaum li cas ntawm Australia no?

Raws li tej xov xwm tau rau lub 6 hli ntuj xyoo 2023 ntawd ces Australia muaj pej xeem txog li 26.6 million tus, uas muaj 18.5 million tus yog cov yug ntawm teb chaws no thiab 8.2 million tus ces yog cov neeg yug txawv teb chaws ntawm ib lub teb chaws twg.

Thiab xyoo 2023 ces muaj haiv neeg no tej pej xeem uas yog cov neeg yug txawv teb chaws coob tuaj ntxiv yuav laug txog li 500,000 tus.

Cov teb chaws twg yog cov muaj tej neeg Australia tshiab tuaj coob tshaj plaws?

Muaj peb lub teb chaws yog cov teb chaws uas muaj Australia cov pej xeem yug txawv teb chaws sib sau ua ke coob tshaj ib feem peb ntawm Australia tej pej xeem.

Raws li tej xov xwm tshia qhia ces teb chaws Askiv, India, Suav thiab New Zealand yog cov teb chaws uas muaj Australia cov pej xeem yug txawv teb chaws coob tshaj plaws.

Txawm tias tej neeg yug ntawm teb chaws Askiv tseem yog Australia cov pej xeem yug txawv teb chaws coob tshaj plaws, uas muaj txog li 962,000 tus, los yeej tau muaj tej neeg no ib nyuag tsawg me ntsis ntau dua li 1 million tus rau lub caij 10 ua ntej dhau los thiab.

Pab neeg coob zum ob ces yog cov neeg Australia uas yug ntawm teb chaws India, uas muaj 846,000 tus thiab tau nces coob tuaj ntxiv ntawm 754,000 tus xyoo 2022 los lawm.

Australia tej pej xeem uas yug ntawm teb chaws Suav ces muaj ib nyuag tsawg zog tej xub muaj rau ntau xyoo dhau los, thiab muaj coob zum peb txog li 656,000 tus.

Hos tej yug ntawm teb chaws New Zealand ces kuj muaj coob tshaj qub ua tam sim no tseem nyob ntawm teb chaws Australia thiab.

Ces thiaj ua rau neeg New Zealand (Kiwis) yog Australia tej pej xeem yug txawv teb chaws muaj coob ua zum 4, thiab muaj txog li 598,000 tus.

Thiab tsis tas li ntawd los kuj tseem muaj 170,000 tus neeg Australia uas yug ntawm lub teb chaws no ntxiv rau lub teb chaws no tej pej xeem lawm. Thiab tus zauv ntawd ces yog tus zauv yug uas rho tawm ntawm tej neeg tas sim neej thiab tej neeg tawm mus nyob rau lwm lub teb chaws.

Ua tib zoo txheeb kom ntxaws txog Australia tej pej xeem uas yog cov neeg yug txawv teb chaws

Australia cov pej xeem ntawm tej zejzog neeg Indian, Chinese, Nepali thiab Filipino yog cov muaj coob tshaj plaws ntxiv tuaj rau lub caij xyoo 2013 txog 2023.

Tej teb chaws ntawm ntau lub teb chaws uas muaj tej neeg nyob ntawm Australia no yam tsawg li 1,000 tus ntawd, ces teb chaws Latvia yog cov neeg muaj hnoob nyoog tshaj plaws, vim muaj hnoob nyoog nrab 80 xyoo lawm.

Tej neeg zejzog uas muaj tej neeg Australia yug txawv teb chaws uas nyob ntawm Australia no tau muaj ntau tuaj ntxiv txoj li xyoo 2013-2023 lawm. Source: SBS

Hos yog cov neeg Australia yug txawv teb chaws uas muaj hnoob nyoog qes tshaj plaws ces yog cov tuaj ntawm teb chaws Qatar tuaj, vim lub teb chaws no tej pej xeem yeej muaj lub hnoob nyoob nrab txog li 15 xyoos xwb.

Tsis tas li ntawd los yej tseem muaj tej txiv neej neeg Ni-Vanuatu ntawm Australia coob tshaj tej poj niam yuav laug txog li peb npaug, thiab kuj muaj tej poj niam neeg Thaib coob tshaj tej txiv neej neeg Thaib ntawm Australia no txog li ob npaug thiab.

Yog piv Australia rau ntiaj teb ne ho zoo li cas

Thoob ntiaj teb no ces yeej tau kwv yees tias muaj tej neeg txog li ntawm 280.6 million tus (3.6 feem pua yog tej nyob ntawm Australia) uas yog cov neeg yug rau ib lub teb chaws twg tab sis mus nyob rau lwm lub teb chaws xyoo 2020.

Thiab Meskas yog lub teb chaws uas muaj tej neeg yug txawv teb chaws mus nyob coob tshaj plaws lwm haiv neeg.

Vim yeej muaj tej neeg yug txawv teb chaws coob tshaj 50 million tus nyob ntawm lub teb chaws no (Meskas) thiab muab xam ua 15.3 feem pua ntawm tag nrho nws tej pej xeem.

Australia ces yog lub teb chaws zum 9 uas muaj tej neeg yug txawv teb chaws tuaj nyob ntawm no, tab sis muaj tej neeg no yog Australia cov pej xeem coob dua txog li ntawm 29.9 feem pua diam.

Hos yog tham txog teb chaws United Arab Emirates lawm ces yeej tseem muaj tej pej xeem yug txawv teb chaws txog li 88.1 feem pua, thiab muaj tej neeg no txog li 72.8 feem pua ntawm Kuwait tej pej xeem ces kuj yog cov neeg yug txawv teb chaws thiab.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.