Ntsiab lus tseem ceeb:
- Raws li cov Women, Peace and Security Index qhia ces Australia yog lub teb chaws zoo ua zum 11 rau tej poj niam hauv ntiaj teb no.
- Tej kws teeb txheeb tau txheeb ntau yam li cov kev muaj feem koom, kev ruaj ntseg thiab kev ncaj ncees los ua cov pab xaiv cov zum.
- Ntawm tag nrho 177 lub teb chaws uas lawv tau tshuaj ntsuam ces pom tau tias Denmark yog lub teb chaws zoo tshaj plaws rau tej poj niam, hos Afghanistan yog lub teb chaws phem tshaj plaws rau tej poj niam.
Australia yog lub teb chaws zoo tshaj plaws ua zum 11 rau ib tug poj niam hauv ntiaj teb no raws li cov index uas tau txheeb 177 lub teb chaws hauv ntiaj teb no uas tau txheeb tias seb poj niam puas muaj feem koom, puas tau txais kev ncaj ncees thiab puas tau txais kev ruaj ntseg.
Yog li ntawd cov xov xwm tshiab hu ua Women, Peace and Security Index thiaj tau teev teb chaws Denmark tias yog lub teb chaws zoo tshaj plaws rau tej poj niam thiab tau teev Afghanistan tias yog lub teb chaws phem tshaj plaws rau tej poj niam.
Cov kev tshuaj ntsuam no thiaj tau txheeb txog 13 yam li cov kev ua hauj lwm, zejzog cov kev nyab xeeb, cov kev muaj feem khwv nyiaj, cov kev tau ua nom hauv tsev tsoom fwv, cov kev tau siv cai lij choj, cov kev puas nyob ze rau tej chaw muaj tso rog tsis sib haum xeeb.
Thiab tau coj cov kev tshuaj ntsuam uas txheeb tau no coj mus cej luam rau ntawm lub tsev kawm qhiab siab Georgetown University lub chaw teeb txheeb Institute for Women, Peace and Security and the Peace Research Institute, kuj yuav muaj peev xwm coj los siv txheeb tias seb ho muaj tej xwm txheej dab tsi, coj los ua cov pab tsim cai thiab coj los ua cov nias kom tej nom tswv yuav tau kub siab nrog daws.
Nod yog piv tias Australia tau zum li cas hauv ntiaj teb no.
Raws li Women, Peace, Security Index hais ces tag nrho thawj tsib lub teb chaws zoo tshaj plaws rau tej poj niam ces yog cov nyob ntawm nrim av Europe. Source: SBS
Australia ho yog lub teb chaws zoo npaum li cas rau tej poj niam?
Yog piv rau ntau lub teb chaws lawm, ces Australia kuj yog lub uas tej poj niam yug me nyuam tas sim neej tsawg dua, vim tau siv tej kev kho mob zoo dua thiab muaj tej kev kho mob zoo uas pab tau rau tej poj niam raws li qhov lawv xav tau.
Australia tsuas muaj txhua txhua 2.9 tug poj niam uas yug me nyuam twg ntawm 100,000 tus twg thiaj tag sim neej xwb.
Norway ces yog lub zoo tshaj plaws vim tsuas muaj tej poj niam tas sim neej txhua txhua 1.7 tus twg xwb, hos Meskas (United State of America -USA) ces yog lub phem tshaj plaws rau tej poj niam vim muaj 21.1 tug poj niam tas sim neej thaum yug me nyuam diam.
Australia los kuj yog lub uas pheej nyiam yug me nyuam tub coob dua thiab faib cais tsis nyiam poj niam.
Cov index no tau mus txheeb txog tej me nyuam tub yug tau los piv rau tej me nyuam ntxhais yug tau 100 tus twg ces pom tau tias Australia muaj me nyuam tub coob txog li 105.6 tus diam.
Hos yog tham txog cov kev nyab xeeb lawm, ces zoo li Australia yog lub teb chaws zoo tshaj plaws uas yeej tsis muaj tej poj niam nyob ze rau ntawm tej chaw muaj tsov rog ze li 50 km li.
Thiab raws li tsab ntawv cej luam no qhia, ces kev sib ntaus sib tua tsis sib haum xeeb yuav ua rau muaj ntau yam teeb meem rau tej poj niam li yuav ua rau tej poj niam raug teeb meem kub ntxhov ntau dua, yuav ua rau muaj teeb meem rau lawv lub neej dua, ua rau lawv tsis tshua tau kawm ntawv dua, thiab ua rau lawv tsis muaj peev xwm siv tau tej kev kho mob dua.
Israel yog lub teb chaws tau cov zum no phem tshaj plaws txog li 97.2% vim tej poj niam yeej nyob ze dua nrog tej chaw uas muaj cov kev sib ntaus sib tua ua tsov rog.
Tab sis Australia yeej tau cov zum tsis zoo yog piv rau lwm cov teb chaws uas tej poj niam tau txais kev nyab xeeb hauv tej zejzog dua, vim tsuas muaj tej poj niam txog li 54% ntawm Australia thiaj qhia tias lawv tau txais kev nyab xeeb yog lawv taug kev tib leeg hmo ntuj xwb tsis hais lawv nyob qhov twg li.
Txawm tias tau cov feem pua no nces siab tuaj ntxiv ntawm 48.7% rau xyoo 2017, los kuj tseem qes dua cov feem pua ntawm teb chaws Singapore thiab, uas yog lub teb chaws uas tau cov feem puas txog 94% uas tej poj niam mloog tau tias lawv tau txais kev nyab xeeb.
Australia los kuj yog ib lub teb chaws zoo heev yog tham txog cov kev muaj feem koom khwv nyiaj, vim nws tau 100% rau tej poj niam hnoob nyoog 15 xyoos los yog hnoob nyoog siab tshaj ntawd yeej yog tej poj niam uas muaj lawv ib phau ntawv siv nyiaj (Bank account) los yog koom siv ib phau bank account nrog lwm tus ntawm ib lub txhab nyiaj twg los yog ntawm lwm cov tuam txhab nyiaj twg.
Tsab ntawv cej luam (Report) no kuj tau txheeb txog cov kev muaj peev xwm siv tau cai lij choj pab cuam thiab, uas tau siv tus zauv ntxaiv (0) mus txog tus zauv plaub (4) coj los teev tias seb tej poj niam puas muaj peev xwm mus hais plaub ntawm tej tsev hais plaub thiab puas tau siv cov kev hais plaub uas tau txais kev ncaj ncees.
Ces kuj pom tau tias Australia tau cov zauv no txog li 3.7 diam, thiab tsuas tsawg dua Denmark uas yog lub teb chaws tau tus zauv no siab tshaj plaws txog 3.96.
Tej kws teeb txheeb no kuj tau qhia tias tej xov xwm tshawb fawb tau no kuj tseem qhia tias tej teb chaws uas tej poj niam muaj feem koom rau ntau yam zoo dua ntawd yeej yog cov teb chaws uas tau txais kev thaj yeeb dua, muaj cov kev tswj hwm democracy ntau dua, vam meej dua thiab muaj peev xwm npaj kom tig tau cev los yog ntxeem dhau tej teeb meem muaj los ntawm tej huab cua pauv hloov tau zoo dua thiab.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab Downloadthiab caum
