Xov xwm luv tshaj tawm hnub zwj Feej (Wednesday news 24.04.2024):
Kuj tau muaj tej kws kho mob tshiab uas nyuam qhuav mus ua hauj lwm tam li yog cov kws kho mob tshiab uas coob tshaj 20,000 tus tej zaum kuj yuav tau ib cov nyiaj hais ib rooj plaub vim rau qhov tias lawv khwv tau nyiaj tsawg tshaj qhov tsim nyog khwv tau. Tau muaj ib rooj plaub ntawm xeev NSW no lub tuam chav lis laj fai tswj kev noj qab haus huv no them nyiaj yuav laug txog li ntawm $230 million rau cov kws kho mob tshiab uas nws them nyiaj tsawg tsis raws li qhov tsim nyog.
Tsoom fwv teb chaws Australia tau qhia tias nws yeej txhawb nqa lub koom haum eSafety Commission rooj plaub uas teb chaws Australia tseem tab tom yuav mus hais nrog lub tuam txhab social media platform X uas sawv daws paub tias yog Twitter dhau los. Lub koom haum no tseem yuav mus hais plaub ntawm Federal Court hnub tim 24 lub 4 hlis ntuj no kom rub lub sij hawm kom ntev tuaj ntxiv li ob hnub pub rau lub tuam txhab X no tshem cov video uas tej neeg tsim kev kub ntxhov rau ntawm Western Sydney ib lub church tawm.
Australia tus nom teb chaws uas ua cov hauj lwm pab rau tej poj niam kuj muaj cov kev txhawb nqa kom los ua tib zoo xyuas kom tej poj niam tau txais kev nyab xeeb, rau lub caij uas tsoom fwv xeev New South Wales (NSW) no tseem tab tom yuav ua tib zoo los xyuas tias seb puas yuav hloov nws tej cai yuav coj los tswj cov teeb meem kub txhov thiab tej nyiaj teem txim. Chris Minns uas yog tus hau xeev NSW thiaj li tseem tab tom npaj yuav los txheeb xyuas tej cai no tom qab tau muaj tus poj niam hu ua Molly Ticehurst uas muaj hnoob nyoog 28 xyoo ntawm lub zos Forbes no tau ras los ua tus poj niam zum 25 uas tau tas sim neej cuam tshuam nrog cov teeb meem kub ntxhov hauv lub cuab yig.
Australia xya tus tub rog uas raug tua tuag nyob rau tsov rog ntiaj teb zeeg ib ntawm kob tsov rog Fromelles no raug txheeb tau tias lawv yog leej twg lawm. Tom qab lawv tau tas sim neej ntev dua li 100 xyoo no ces Australia thiaj li muaj peev xwm txheeb tau cov tub rog uas tau muaj coj mus faus rau ntawm ib co toj ntxas uas faus cov tub rog ntau heev thaum uas lawv tau siv cov DNA los yog tej pov thawj keeb kwm los pab txheeb tej neeg no.
Tam sim no ces kuj pom tau tias Australia cov kab theem nyiaj poob nqe no kuj tau nqes los ua 3.6 feem pua lawm xwb qhia tau tias tej zaum txhab nyiaj faj seeb haiv (Reserve Bank of Australia) yuav tsis txo kab theem paj rau lub xyoo no. Ces thiaj li yog tus kab theem nyiaj poob nqes rau thawj peb lub hlis uas lub koom haum Australian Bureau of Statistics (ABS) tau coj los qhia rau xyoo 2024 no.
Australia tus coj lub koom haum soj xwm qab rooj tau qhia tias cov encrypted messaging services no raug tej neeg phem coj mus siv. Tus coj lus koom haum ASIO (Australian Security Intelligence Organisation) thiab tus coj tub ceev xwm teb chaws tau nqua hu kom cov tuam txhab social media pab los tswj tej cai no rau lub caij uas nkawv tau mus koom nrog lub nrog tej xov xwm tham rau hnub no.
Kuj tau muaj tej neeg rwg npoj tawm tsam txhawb nqa rau cov neeg Palestinians no muaj ceem zuj zus tuaj ntxiv rau ntawm ntau lub tsev kawm qib siab thoob teb chaws Meskas rau lub caij uas tej tub kawm raug txhom thiab muaj ntau lub tsev kawm raug yuam kom tej tub kawm mus kawm hauv online los yog kawm virtual learning lawm xwb. Lub tsev kawm qib siab Columbia University no kuj tau tso tseg tsis qhia cov sob kawm tim ntsej tim muag rau hnub zwj Hli (Monday) rau lub caij tej neeg mus pw rau hauv New York city campas limtiam dhau los no.
Nyob rau teb chaws Israel no ces kuj tau muaj ntau pua tus neeg tau mus rwg npoj tawm tsam rau ntawm tej kev ntawm Tel Aviv coj los ua kev nco txog 200 hnub uas tau muaj cov kev sib ntau sib tua ntawm Gaza. Tej neeg no nqua hu kom yuav tsum tso 130 tus neeg uas raug Hamas muab txhom thiab kom Israel tus thawj pwm tsav Benjamin Netanyahu tawm tsis txhob ua nws tus nom lawm.
Tsoom fwv teb chaws tseem tab tom yuav los tias seb nws puas yuav los kho nws cov point testing systems rau cov skilled migrants los yog cov neeg tsiv teb tsaws chaw uas muaj txuj ci paub ua hauj lwm los ua ib cov kev txiav txim siab tias seb yuav tso cai rau leej twg tuaj ua hauj lwm nyob rau teb chaws no. Vim rau qhov tias yeej tau siv cov Point Testing Systems no coj los txheeb tej neeg txog li 2 feem 3 uas tuaj ua hauj lwm ntawm teb chaws Australia no, thiab twb tau 12 xyoos lawm uas nws tsis tau kho tej system no. Ces thiaj li tau txib kom Australia lub tsev kawm qib siab Australia National University ua tus mus txheeb tej hauj lwm no tias tej txuj ci twg thiaj yuav pab kom Australia ua tau lagluam zoo.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
