Australia tus thawj pwm tsav qhuas tus neeg fab kis cov kev muaj tsab peev xwm

Australia tus thawj pawm tsav Anthony Albanese tau qhua ib tug pej xeem Fabkis tias yog tus muaj tsab peev xwm rau nws cov kev los pov puag tej neeg uas Joel Cauchi tau siv riam nkaug ib co neeg ntawm Bondi Junction ntawm lub khw Westfield Shopping Centre.

Xov xwm luv Credit: SBS/Max Banyat

Xov xwm luv tshaj tawm hnub zwj Quag (Tuesday news 16.04.2024):

Thawj pwm tsav Anthony Albanese tau qhua ib tug pej xeem neeg Fabkis uas tau sib ib tug qws bollard mus pov puag tej neeg thaum Joel Cauchi tau siv riam los tawm tsam tej neeg ntawm Bondi Junction. Kuj tau muaj neeg yees tau ib daim video uas pom Damien Guerot yog ib tug txiv neej neeg Fabkis tau siv ib tug qws bollard tawm tsam nrog Cauchi ntawm ib tug ntaiv. Ces Mr Albanese thiaj hais tias Mr Guerot yog ib tug uas Australia zoo siab tos txais tam li yog pej xeem Australia. Mr Albanese hais tias 'Kuv xav hais rau Damien Guerot uas tseem tab tom thov visa tias zoo siab tos txais koj tuaj rau ntawm teb chaws no, thiab peb yeej zoo siab cia koj nyob kom ntev npaum li qhov koj xav nyob. Peb xav thov ua tsaug rau nws rau lub cov kev muaj peev xwm.''

Tej neeg Israelis tseem tab tom tos tias seb lawv tus thawj pwm tsav Benjamin Natanyahu yuav ua li cas rau Iran thawj cov kev tawm tsam ncaj qha rau nws lub teb chaws rau lub caij tseem raug zejzog pej kum haiv tsub nias kom cheem nws tus kheej vim ntshai tsam muaj kev kub ntxhov ntau tuaj ntxiv ntawm cheeb tsam Middle East. Mr Netanyahu thiaj raug nws pab nom tswj tsov rog hu mus sab laj zaum ob rau lub caij tsawg dua 1 hnub tias seb yuav ua li cas rau Iran tej foob pob thiab drone tua nws rau ob hnub so dhau los. Uas Herzi Halevi uas yog Israel tus coj tub rog thiaj tau hais tias nws lub teb chaws yeej yuav tawm tsam tab sis kuj tseem tsis tau qhia xov xwm dab tsi ntxaws.

Tus coj lub tuam txhab Woolworths kuj tsis kam los qhia kom meej tias seb puas yog nws khwv tau nyiaj ntau tuaj ntxiv txog li 26 feem puas es thiaj ua rau nws khwv tau nyiaj tsam $1.7 billion financial year dhau los. Senatro Nick McKim uas yog ib tug nom ntawm pab nom Greens thiaj tau nug tas los rov qab nug nws kom qhia meej tias seb puas yog los tsis yog nws siv tej tswv yim no los khwv nyiaj. Mr Bunduchi thiaj hais tias: Yog peb txheeb txog tej nyiaj khwv tau los ces, Senator McKim hais tias: kuv tsis kub siab tias koj yuav saib dab tsi li Mr Banduchi. Koj pheej tsis teb kuv los lus nug li. Xav kom koj teb lo lus nug. Puas yog koj tsis pom zoo rau tej nyiaj tsam khwv tau tsaib no txog li 1.7 billion dollars tias yog cov nyiaj khwv tau ntau tuaj ntxiv txog li 26 feem pua lawm. Mr Banducci: Peb yeej tau txheeb txog qhov tseem ceeb ntawm cov kev khwv tau nyiaj thiab.

Lub tuam txhab tsim tsheb Tesla npaj yuav muab tej neeg rho tawm hauj lwm txog li ntawm 10 feem pua kom thiaj muaj nuj nqes siv ua lagluam tsawg zog, rau qhov muaj neeg yuav tsheb siv hluav taws xob tsawg zog thiab muaj cov kev sib tw lagluam tsim tsheb siv hluav taws xob ntawm Suav tej chaw tsim tsheb siv hluav taws xob ntau tuaj ntxiv uas muag tus nqe pheej yig dua lawm. Ces tej zaum thiaj xav tias yuav muaj tej neeg txog li ntawm 14,000 tus raug rho tawm tawm tag nrho 140,000 tus neeg ua hauj lwm.

Donald Trump tau raug coj mus hais plaub ntawm New York vim raug liam tias nws npog tsis qhia txog tej nyiaj them xiab Stormy Daniels ua ntej yuav muaj cov kev xaiv tsa xyoo 2016. Ces thiaj yuav ua rau nws ras los ua Meskas thawj tus president uas yuav raug coj mus hais plaub vim nws ua txhaum ib yam dab tsi. Stormy Daniels hais tias nws thiab Donald Trump tau sib deev xyoo 2006 thiab Michale Cohen uas yog Trump tus kws lij choj lub caij ntawd yog tus them nyiaj xiab nws kom tsis txhob hais dab tsi.

Bruce Lehrmann kuj tab tom ntsib ib co nuj nqes hais plaub ntau heev tom qab nws tau swb nws rooj plaub hais nrog lub chaw nthuav xov xwm tshooj 10 tus neeg tshaj xov xwm Lisa Wilkinson. Tej kws lij choj tau hais kom nws yuav tsum them tej nqe hais plaub hnub zwj Hli (Monday) tim 22 lub 4 hlis ntuj thiab lub chaw nthuav xov xwm tshooj 10 los yeej xav tau nws qee cov nqe hais plaub rov qab. Lub caij uas Michael Lee txiav txim rooj plaub no ces nws kuj txheeb tau tias tej zaum Bruce Lehrmanna kuj tau yuam deev Brittany Higgins hauv tsev tsoom fwv xyoo 2019 thiab. Yog tias koj los yog ib tug twg xav sab laj txog cov teeb meem sexual harrassment thiab teeb meem kub ntxhov hauv lub cuab yig ces muaj peev xwm hu tau rau lub koom haum 1800RESPECT tus xov tooj 1800 737 732 los sis txheeb tau tej xov xwm ntawm lub vas sab www.1800RESPECT.org.au. Thiab yog koj ho poob rau tej xwm txheej kub ntaiv uas yuav muaj kev phom sij rau koj txoj sia ces hu rau tus xov tooj 000.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.