'ເມື່ອຍເພັຍ ແລະລາອອກ': ວິທີທີ່ນາຍຈ້າງອອສເຕຣເລັຍ ສາມາດຊ່ວຍ ໃຫ້ພະນັກງານຟື້ນໂຕ ຈາກໂຣກລະບາດ

ອອສເຕຣເລັຍ ອາດຫຼີກລ່ຽງ 'ການລາອອກຄັ້ງໃຫຍ່' ໃນປີ 2021 ແລະ 2022. ແຕ່ລາຍງານ State of the Future of Work ປີ 2023 ເຕືອນວ່າ ພະນັກງານອອສເຕຣເລັຍ ເມື່ອຍເພັຍ ແລະມີແຮງຈູງໃຈຫນ້ອຍລົງ. ຫນຶ່ງໃນສາມຄົນງານ ທີ່ມີອາຍຸ 18-55 ປີກໍາລັງພິຈາລະນາ ທີ່ຈະລາອອກ.

Researchers from the University of Melbourne have released the 2023 State of the Future of Work Report, which focuses on how Australian workers are recovering from the COVID-19 pandemic. (file) Source: AAP / JANE DEMPSTER/AAPIMAGE

ຜູ້ກໍ່ຕັ້ງ ແລະຫົວຫນ້າຜູ້ຈັດການ ຂອງ Renovatio ໃນ Sydney, Vincent Candrawinata ປະສົບກັບຄວາມເມື່ອຍເພັຍ ໃນລະຫວ່າງໂຄວິດລະບາດ.

"ມັນຍັງສືບຕໍ່ຢູ່ໃນອຸດສາຫະກັມມັດຫໍ່ ແລະສົ່ງພັດສະດຸ. ການຂາດແຄນພະນັກງານ ແມ່ນມີຢູ່ທົ່ວໄປ," Mr Candrawinata, ຜູ້ຈັດຫາ ຜລິດຕະພັນວິຕາມິນ ແລະຜລິດຕະພັນຮັກສາຜິວຫນັງ ໃຫ້ກັບ supermarkets ເຊັ່ນ Woolworths ແລະ Coles, ກ່າວກັບ SBS.

ທ່ານກ່າວວ່າ ພະນັກງານສ່ວນໃຫຍ່ ບໍ່ໄດ້ເວົ້າເຖິງຄວາມອິດເມື່ອຍ, ຍ້ອນຢ້ານວ່າ ມັນຈະຖືວ່າເປັນສັນຍານ ຂອງຄວາມອ່ອນແອ.

ທ່ານ Candrawinata, ສະມາຊິກຂອງຊຸມຊົນອິນໂດເນເຊັຍກ່າວວ່າ "ພວກເຂົາເຈົ້າຮູ້ສຶກວ່າ ມັນຈະເຮັດໃຫ້ພວກເຂົາເຈົ້າ ມີການແຂ່ງຂັນຫນ້ອຍລົງ."

Vincent Candrawinata

ບົດລາຍງານ State of the Future of Work ປີ 2023 ໂດຍ the University of Melbourne ເປີດເຜີຍວ່າ ການລະບາດຂອງພະຍາດ COVID-19 ມີຜົນກະທົບ ທີ່ສໍາຄັນ ແລະຍືນຍົງ ຕໍ່ສຸຂະພາບ ແລະສວັດດີການ ຂອງພະນັກງານຊາວອອສເຕຣເລັຍ.

ພະນັກງານໃນວັຍເຮັດວຽກ ຂອງອອສເຕຣເລັຍ ເມື່ອຍ, ບໍ່ມີແຮງຈູງໃຈ ກ່ຽວກັບວຽກງານຂອງຕົນ ແລະ ບໍ່ສາມາດເອົາໃຈໃສ່ ໃນການເຮັດວຽກໄດ້ ຍ້ອນມີຄວາມຮັບຜິດຊອບນອກວຽກ.

2023 State of the Future of Work report

ການລະບາດໄດ້ສົ່ງຜົນກະທົບຕໍ່ໄວຫນຸ່ມ (18-34 ປີ) ແລະ ຄົນງານອາຍຸລະຫວ່າງກາງ (35-54 ປີ) ຫຼາຍກວ່າພະນັກງານທີ່ມີອາຍຸສູງ (ອາຍຸ 55 ປີຂຶ້ນໄປ).

ລາຍງານເປີດເຜີຍວ່າ ພະນັກງານຫນຶ່ງໃນສາມຄົນ ໃນວັຍເຮັດວຽກກໍາລັງພິຈາລະນາ ຈະລາອອກຈາກວຽກ ເມື່ອທຽບໃສ່ກັບ ພະນັກງານ ຫນຶ່ງໃນຫ້າຄົນ ທີ່ມີອາຍຸສູງກວ່າ.

ເຂົາເຈົ້າບໍ່ມີສະມາທິ ໃນການເຮັດວຽກໄດ້. ພວກເຂົາເມື່ອຍ ແລະບໍ່ມີເວລາ. ມີໂອກາດຫນ້ອຍສໍາລັບຄວາມກ້າວຫນ້າ ແລະສຸຂະພາບຈິດຂອງພວກເຂົາ ກໍາລັງທຸກທໍຣະມານ

ສາດສະດາຈານ Leah Ruppanner, ຜູ້ຂຽນລາຍງານກັບຄົນອື່ນ, ໄດ້ກ່າວວ່າ ຄວາມອິດເມື່ອຍ ແລະເບື່ອໜ່າຍວຽກ ແມ່ນຍັງສະສົມ ຢູ່ໃນແຮງງານຂອງອອສເຕຣເລັຍ.

"ອອສເຕຣເລັຍ ບໍ່ໄດ້ປະສົບກັບການລາອອກ ຄັ້ງໃຫຍ່ ໃນປີ 2021 ແລະ 2022, ຄ້າຍຄືກັນກັບປະເທດອື່ນໆ. ແຕ່ພວກເຮົາ ກໍາລັງຊີ້ໃຫ້ເຫັນຢ່າງແນ່ນອນວ່າ ແຮງງານອອສເຕຣເລັຍບໍ່ສະບາຍໃນເວລານີ້."

ພະນັກງານ ໄດ້ປະສົບກັບການເບື່ອໜ່າຍວຽກ (ອິດເມື່ອຍ, ແຮງຈູງໃຈຫນ້ອຍລົງ ແລະສະມາທິບໍ່ດີ) ກ່ອນການລະບາດ, ດັ່ງນັ້ນ ຕອນນີ້ມັນແຕກຕ່າງກັນແນວໃດ?

Prof Ruppanner ກ່າວວ່າ ການເບື່ອໜ່າຍວຽກບໍ່ແມ່ນສິ່ງໃຫມ່. ສິ່ງທີ່ແຕກຕ່າງກໍຄື ຄວາມຮຸນແຮງ ເມື່ອເຮືອນໄດ້ກາຍເປັນໂຮງຮຽນ, ບ່ອນດູແລເດັກ ແລະສູນໃຫ້ການດູແລ.

"ຜູ້ຄົນຢູ່ບ້ານເປັນເວລາດົນ. ພວກເຮົາ ມີຄວາມບໍ່ແນ່ນອນ ຢ່າງເຫລືອເຊື່ອ, ແລະຂອບເຂດຂອງເຮົາໄດ້ຖືກປິດໄວ້."

ການແກ້ໄຂ

Prof Ruppanner ກ່າວວ່າ ຜູ້ຕອບແບບສອບຖາມໃນການສຶກສາ ຂອງເຂົາເຈົ້າ ໄດ້ພົບເຫັນວິທີການເຮັດວຽກ ທີ່ມີຄວາມຍືດຍຸ່ນເປັນປໂຍດສໍາລັບສຸຂະພາບຈິດ ແລະຮ່າງກາຍຂອງເຂົາເຈົ້າ.

ລາວກ່າວວ່າ: "ການໃຫ້ພະນັກງານມີທາງເລືອກໃນບ່ອນທີ່ພວກເຂົາເຮັດວຽກ, ວິທີການເຮັດວຽກ ແລະເວລາພວກເຂົາເຈົ້າເຮັດວຽກ, ແລະລໍາດັບຂອງສິ່ງຕ່າງໆ ອາດຈະເປັນແນວຄິດທີ່ເປັນປໂຍດ."

ລາຍງານສະບັບນີ້ ໄດ້ແນະນໍາໃຫ້ ພິຈາລະນາກົດຫມາຍ ວ່າດ້ວຍການ ເຂົ້າເຖິງວຽກງານ ທີ່ມີຄວາມຍືດຍຸ່ນ ແລະ ຢູ່ນອກສະຖານທີ່ ວ່າເປັນບ່ອນເຮັດວຽກ ທີ່ສໍາຄັນ.

ຄູສອນຊີວິດ ແລະທຸລະກິດ (Life and business coach) Christina Foxwell ເຊື່ອວ່າ ນາຍຈ້າງຄວນເອົາໃຈໃສ່ ໃນການສ້າງບ່ອນເຮັດວຽກ ທີ່ເຫມາະສົມທາງຈິດໃຈ.

ທ່ານນາງ Foxwell ກ່າວວ່າ "ບ່ອນທໍາງານທີ່ເຂົ້າໃຈ ເຖິງສິ່ງທ້າທາຍ ຂອງຜູ້ຄົນ ແລະເຮັດວຽກພາຍໃນ ເພື່ອສ້າງໂຄງການ ແລະການປະຕິບັດ ທີ່ມີສ່ວນຮ່ວມໃນສຸຂະພາບ.

ສຸຂະພາບ ບໍ່ແມ່ນການອອກກໍາລັງກາຍ ໃນເວລາກິນເຂົ້າທ່ຽງ ຫຼືພຽງແຕ່ຈອງ ການນັ່ງສະມາທິສໍາລັບທີມງານ ອາທິດລະເທື່ອ.

ທ່ານນາງ Foxwell ກ່າວຕື່ມວ່າ "ສຸຂະພາບເປັນສິ່ງຈໍາເປັນ ຂອງອົງການ ທີ່ເບິ່ງທີ່ຈິດໃຈ, ປະຕິບັດຈິດຕະວິທຍາໃນທາງບວກ ແລະນໍາຄວາມເຫັນອົກເຫັນໃຈ ແລະຄວາມຊື່ສັດມາສູ່ຊີວິດ.

ລາຍງານໄດ້ກ່າວວ່າ ຣັຖບານສາມາດມີສ່ວນຮ່ວມ ໂດຍໃຫ້ຄວາມສໍາຄັນ ຕໍ່ການບໍຣິການດ້ານສຸຂະພາບຈິດ. ຍົກຕົວຢ່າງ, ພວກເຂົາເຈົ້າ ສາມາດເພີ່ມຂີດຈໍາກັດ ໃນການຂໍເງິນຄືນ (Claims) ຈາກການນັດຫມາຍ ເລື່ອງສຸຂະພາບຈິດປະຈໍາປີ ຫຼືໄດ້ຮັບເງິນຊ່ວຍເຫຼືອ ໃນດ້ານນີ້.

ລາຍງານ ໄດ້ແນະນໍາໃຫ້ຣັຖບານ ແລະ ບ່ອນເຮັດວຽກ ໃຫ້ບໍຣິການດູແລເດັກ ທີ່ມີຄຸນນະພາບສູງຟຣີ ຢ່າງທົ່ວເຖິງ ແລະ ການທົດແທນຄ່າຈ້າງສູງທີ່ ຈ່າຍການຈ່າຍເງິນ ໃຫ້ພໍ່ແມ່ຕອນລາວຽກເມື່ອມີລູກ

ຜູ້ໃຫ້ການດູແລ ເຮັດວຽກຫນັກກວ່າ ແລະເມື່ອຍຫຼາຍກວ່າ ກ່ອນເກີດໂຣກລະບາດ.

ການຈ່າຍເງິນ ໃຫ້ພໍ່ແມ່ຕອນລາວຽກເມື່ອມີລູກ ອາດຖືກສງວນໄວ້ ສໍາລັບພໍ່ ໃນຂໍ້ຕົກລົງແບບ “ໃຊມັນ ຫລືເສັຍມັນ” ດັ່ງທີ່ ລາຍງານໄດ້ພົບວ່າ "ຜູ້ດູແລຜູ້ຊາຍ ກໍາລັງທົນທຸກຢູ່ບ່ອນທໍາງານ ໃນອັດຕາທີ່ສູງກວ່າ ຜູ້ຊາຍທີ່ບໍ່ມີການຮຽກຮ້ອງໃຫ້ດູແລ."

ລາຍງານຍັງເນັ້ນເຖິງ ການເລືອກປະຕິບັດໃນບ່ອນເຮັດວຽກ.

"ຜູ້ດູແລຜູ້ຊາຍ ລາຍງານວ່າ ເຂົາເຈົ້າໄດ້ຮັບການປະຕິບັດ ຢ່າງບໍ່ຍຸດຕິທັມ ໃນບ່ອນເຮັດວຽກ (55 ເປີເຊັນ) ແລະປະສົບກັບ ການລ່ວງລະເມີດ ຢູ່ບ່ອນເຮັດວຽກ (40 ເປີເຊັນ).

"ຜູ້ດູແລຜູ້ຊາຍ (31 ເປີເຊັນ) ມັກຈະລາຍງານວ່າ ເຂົາເຈົ້າຖືກໄລ່ອອກຈາກວຽກ ຍ້ອນການດູແລ ຫລາຍກວ່າ ຜູ້ດູແລແມ່ຍິງ (22 ເປີເຊັນ)."

ທ່ານນາງ Foxwell ໄດ້ກ່າວວ່າ ເຮົາຕ້ອງຢຸດເບິ່ງເລື້ອງເພດ ໃນການປະຕິບັດ ການເຮັດວຽກ.

"ຜູ້ຊາຍ ທີ່ເປັນຜູ້ດູແລມີຄວາມກົດດັນຫລາຍຂຶ້ນ ດັ່ງທີ່ ເຂົາເຈົ້າອາດຈະຕ້ອງອອກຈາກຫ້ອງການ ໃນຊ່ວງເວລາຫນຶ່ງ ເພື່ອໄປຮັບລູກຂອງເຂົາເຈົ້າ. ຫລືເຂົາເຈົ້າອາດຕ້ອງ ເຂົ້າໄປໃນຣະບົບ (ຄອມພິວເຕີ) ແລະອາດມີລູກ ຢູ່ເທິງຕັກຂອງເຂົາເຈົ້າ."

"ພວກເຮົາ ຕ້ອງກໍາຈັດຄວາມຄິດທີ່ບໍ່ດີກ່ ຽວກັບການດູແລ, ສົ່ງເສີມໃຫ້ຄົນຂອງເຮົາ ໃຫ້ເປັນມະນຸດທີ່ດີທີ່ສຸດທີ່ພວກເຂົາສາມາດເປັນໄດ້, ແລະຍອມຮັບວ່າ ພວກເຮົາຈະຢຸດວັດທະນະທັມການຕັດສິນ ທີ່ສ້າງຄວາມກົດດັນ."

ລາຍງານລະບຸວ່າ ບ່ອນເຮັດວຽກ ບໍ່ປອດພັຍສໍາລັບຜູ້ທີ່ມີພະຍາດຊໍາເຮື້ອ.

"ການເກີດຂຶ້ນຂອງ–COVID ໄລຍະຍາວ ແລະ ການເພີ່ມຂຶ້ນຢ່າງຕໍ່ເນື່ອງ ໃນການແພ່ລະບາດ ຂອງພະຍາດຊໍາເຮື້ອ ໃນບັນດາຄົນໃນວັຍ ເຮັດວຽກ ເປັນຄວາມເປັນຫ່ວງ ທີ່ເພີ່ມຂຶ້ນສໍາລັບຣັຖບານ, ນາຍຈ້າງ, ແລະພະນັກງານ."

ຫຼາຍກວ່າ 40 ເປີເຊັນ ຂອງຄົນທີ່ເປັນພະຍາດຊໍາເຮື້ອ ຢາກລາອອກຈາກວຽກ.

ລາຍງານໄດ້ແນະນໍາໃຫ້ບ່ອນເຮັດວຽກຍົກເລີກຂໍ້ບັງຄັບທີ່ພະນັກງານຕ້ອງສະ ແດງໃຫ້ເຫັນວ່າ ຕົນເອງມີຄວາມພິການ ໃນການເຂົ້າເຖິງການເຮັດວຽກທີ່ຍືືດຍຸ່ນ ແລະ ຍົກເລີກຂໍ້ກຳໜົດຂອງການບໍຣິການ 12 ເດືອນ ກ່ອນທີ່ຈະເຂົ້າເຖິງການເຮັດວຽກ ທີ່ຍືດຍຸ່ນໄດ້.

SBS ມີຄວາມມຸ່ງຫມັ້ນທີ່ຈະສນອງການປັບປຸງ COVID-19 ທັງຫມົດໃຫ້ແກ່ຊຸມຊົນທີ່ມີຫຼາຍວັທະນະທັມແລະ ຫຼາຍພາສາຂອງອອສເຕຣເລັຍ. ຢູ່ຢ່າງປອດພັຍ ແລະ ຢູ່ໃນການຮັບຮູ້ ໂດຍການໄປຢ້ຽມຢາມເປັນປະຈໍາ SBS Corona virus portal, ທີ່ມີຂໍ້ມູນຫຼ້າສຸດໃນພາສາຂອງທ່ານ.