Ntsiab lus tseem ceeb:
- Tej neeg ua txhaum cai yeej tau siv cov Artificial Intelligence (AI) technologies uas sib chab sib chaws coj los tsim tej neeg tej suab kom lawv tau txais txiaj ntsim.
- Tej suab cuav kuj yuav muaj peev xwm siv coj los ua tau ntau yam li coj mus siv dag nyiaj siv, coj mus ua kom ib tug twg puas koob npe thiab yog ib co dag zog uas pheej yig.
- Tej kws paub zoo txog tej xwm txheej no thiaj nqua hu kom zej tsoom xyuam xim ceev faj thaum teb xov tooj nrog ib cov neeg uas yus tsis paub tias yog leej twg tham hauv xov tooj los yog yus cov kev pheej qhia yus tej xov xwm hauv online.
Raws li tej kws paub zoo txog tej xwm txheej neeg phem siv tom txwv ntxias dag tej neeg, ces tej neeg phem uas pheej hu xov tooj tuaj ntxias dag tej neeg sawv daws tab tom nyiag thiab tsim tej neeg tej suab kom thiaj ua txoj coj mus dag tau rau lwm tus tias yog yus li tsim yus lub suab cuav thiab coj mus hawv rau tej neeg yus hlub tshua kom tau nyiaj.
Cov kev tsim kom tau lub suab zoo li yus lub yeej tau raug neeg phem coj mus siv dag lwm tus tias yog yus, coj mus ua dag kom tau nyiaj siv los yog coj mus siv kom lawv tau txais txiaj ntsim rau sab laj fai kum xeeb los tau ntau xyoo. Tab sis kuj pom tias tab tom yog ib cov xwm txheej uas tej neeg ua txhaum cai kuj tau siv tej technologies vam meej los kaw yus tej lus thaum tham xov tooj, .
Tej neeg phem cov kev muaj tej teeb meem no ntau tuaj ntxiv thaib cov kev muaj peev xwm siv tau tej tswv yim no zoo thiaj ua rau tej nom tswv, tej koom haum, tej neeg yuav khoom siv thiab tej koom haum qhia thiab tawm tsam nrog tej neeg phem thiaj tig los kub siab — tsis hais lub txhab nyiaj National Australia Bank (NAB) mus txog rau tus nom tswv xeev Western Australia (WA) — thiaj li tau nqua hu kom zej tsoom yuav tau xyuam xim ceev faj.
"Tam sim no ces peb kuj txhawj txog tej neeg uas hu tuaj rau peb thiab xav tau peb tej xov xwm los yog qhia rau peb tias peb yuav tau them ib yam nqe dab tsi li nqe siv kev tsheb los yog ib yam dab tsi,'' raws li Monica Whitty, uas yog ib tug zeskais uas paub txog cov hauj lwm human factors in cybersecurity thiab yog tus coj lub tuam chav software systems and cybersecurity ntawm tsev kawm qib siab Monash University, tau qhia rau SBS News.
Nws hais ntxiv tias "Tab sis tam sim no ces tej zaum lawv kuj yuav xav los siv peb tej suab thiab yuav qhia cov AI ... kom tsim kom tau tej suab hais lus zoo li peb tej coj mus siv.''
Tej neeg phem ho ua li cas?
Whitty tau piv txwv txog ib co xwm txheej uas tej zaum neeg phem yuav nyiag ib tug neeg twg lub suab thiab rov qab coj lub suab ntawd mus siv ua txhaum cai kom lawv tau txais txiaj ntsim.
Thawj yam ces tej zaum ib tug twg kuj yuav teb ib tsab xov tooj thiab nrog tus neeg hu tuaj uas yus tsis paub ntawd tham, tab sis qhov tseeb, twb yog tus neeg hu tuaj rau yus uas yus tsis paub ntawd yog ib tug neeg phem uas pheej ntxias dag tej neeg ntag. Thiab tej lus yus nrog tus neeg hu tuaj nrog yus tham ntawd kuj muaj peev xwm coj mus siv 'xyaum'' AI kom qog tau yus lub suab zoo tib yam los yog coj mus siv ua ntau yam sib txawv.
Cov kev ua li no ces yog ib co uas paub tias yog 'audio deepfake', uas tej neeg phem yuav siv coj mus ntxias dag lwm tus.
Whitty tau hais tias "Tej neeg phem uas pheej dag lwm tus ntawd tej zaum yuav hu tuaj rau ib tug neeg ntawm yus tsev neeg thiab siv yus lub suab hais tias, 'Kuv lub hnab nyiaj raug neeg muab nyiag lawm, thiab kuv tseem nyob ntawm teb chaws Spain — thov koj pab xa ib qho nyiaj rau kuv puas tau? Kav tsij xa ceev nrooj tuaj. Kuv raug neeg phem txhom lawm. Thiab lawv muab kuv ceev tseg cia lawm. Ces lawv yuav siv yus lub suab coj los tsim tej xwm txheej no kom txaus ntseeg thiab zoo li yog yus lub suab tiag.''
Tsis hais tej video thiab tej suab cuav yeej muaj peev xwm raug coj mus siv ua tau ntau yam tshaj qhov uas tsuas siv mus dag nyiaj siv yam txhaum cai nkaus xwb thiab. Source: AAP
Whitty tau qhia tias "Cov kev dag cuam tshuam txog cov kev plees nkauj nraug los yog cov kev dag cuam tshuam txog kev nqes peev lagluam, ces yeej ib txwm cuam tshuam txog cov kev siv ib tug neeg lub suab kom lwm tus tsis txhob me siab los yog xav tias tsuas nrog tus neeg cuav tham xwb ... vim lub suab yuav pab kom muaj kev sib ntseeg siab ntau ntxiv. Ces thiaj li tau muaj cov kev hloov los siv tej technology uas muaj peev xwm qog tau ib tug twg uas yus paub lub siab kiag lawm. Ces tej no haj yam pab tau tej neeg ua txhaum cai ntawd coj mus siv dag lwm tus tau zoo tshaj qub ntxiv thiab.''
Shahriar Kaisar, ces yog ib tug neeg teeb txheeb txog cybersecurity thiab yog tus coj tswj tej dej num tswj kev ruaj ntseg rau tej xov xwm thiab lagluam ntawm tsev kawm qib siab RMIT tau qhia rau SBS News tias tej kev muaj peev xwm coj tau tej AI (Artificial Intelligence) technoloy li — ChatGPT — tau ua rau tej kev ntxias dag tej neeg no rau ras los ua ib co xwm txheej ''nyuaj tshaj qub ntxiv uas yuav muaj peev xwm qhia tau qhov sib txawv tias qhov twg yog tseeb thiab qhov twg cuav.''
Kaisar tau tshab txhais tias "Lawv tau sib ib tug qauv machine learning model uas lawv muaj peev xwm khaws tej suab piv txwv sib txawv los yog tej thaum khaws tej duab video hauv online — tsis hais yog YouTube video, los yog tej uas yus tso rau hauv TikTok.''
- '
Ces lawv mam li coj tej no mus tso rau cov system ntawd thiab mam li muab txiav ''ua ntau billions toom me me uas tsuas ntev li milliseconds los yog nanoseconds … coj mus tsim tej yam uas zoo tib yam li tseeb tiag, li tej zaum yus yeej tau hnov ntawm lwm tus neeg lawm, uas yeej yog tej yam nyuaj kawg nkaus yuav muaj peev xwm qhia tau qhov sib txawv tias seb yog siv AI tsim los yog tseeb tiag yog thaum siv tej technology no lawm.''
Leej twg yog cov neeg yuav raug tej teeb meem no?
Simon Kennedy yeej hnov txog ntau zaj dab neeg ntawm tej neeg uas raug teeb meem los ntawm tej neeg phem cov kev tsim suab cuav coj mus ua txhaum cai txhua hnub. Tam li yog tus coj ntawm lub koom haum Australian Association of Voice Actors (AAVA), ces nws yeej yog ib tug nawm ib co lagluam uas raug teeb meem tsi ntsees los ntawm tej technology no.
Nws tau qhia rau SBS News tias "Yeej muaj neeg tuaj ntsib peb thiab qhia rau peb tias 'Kuv txheeb tau tias muaj neeg coj kuv lub suab coj mus siv ua ib daim video hauv YouTube uas tsis muaj feem xyuam dab tsi txog kuv li, es kuv yuav ua li cas? Ces los lus teb rau nqe lus nug no tam sim no kiag ces, yeej tsis muaj peev xwm ua tau dab tsi ntau lawm, uas yog tej yam txaus tu siab heev, vim yeej tseem tsis tau muaj cai los tswj tej xwm txheej no li.''
Kennedy tau hais tias kuj tsis yog tej yam dab tsi txawv thiab uas tseem txheeb tau tias tej neeg ua yeeb yam tej suab raug tsim coj mus siv yam tsis tau txais kev tso cai ntawm tus tswv neeg, los yog ua rau lawv cia li tsis tau hauj lwm ua thiab tej hauj lwm ntawd cia li raug coj mus rau tus neeg dag uas siv yus lub suab cuav ua lawm. Ces nws thiaj tab tom los ua tib zoo xyuas kom muaj tej cai coj los siv kom thiaj txwv txiav tau tej xwm txheej no.
Kenney yeej tau koom tes ua hauj lwm nrog lub koom haum AAVA, thiab yeej tau nrog Australia tej nom hauv tsev tsoom fwv tham, yeej tau npaj tej rooj sab laj ntau lub thiab yeej tau tham txog tej no tias tsim nyog yuav yog ib co kev ua txhaum cai yog tias ib tug twg sim lwm tus lub suab cuav coj mus siv yam tsis tau txais kev tso cai ntawm tus tswv neeg — vim rau qhov yog ib co cwj pwm uas yeej yuav muaj peev xwm ua rau muaj teeb meem rau ib tug twg, tsis yog tsuas muaj teeb meem rau tej neeg ua yeeb yam tej suab nkaus xwb.
Nws hais tias "Zoo li yeej yog tej yam yooj yooj yim xwb, tab sis yeej tseem tsis tau coj los sau ua cai siv. Yog ua tib zoo los xyuas, thiab tsim kom tau cai los siv ces tej zaum kuj yuav muaj peev xwm los pab pov puag tau txhua tus pej xeem Australia lub suab thiab lawv tej duab. Vim yus tsis muaj peev xwm yuav siv ib tug twg tej hauj lwm dawb yam tsis tau txais kev tso cai pom zoo, thiab tsis tsim nyog yus yuav muaj peev xwm siv tau cov kev zoo sib xws dawb yam lawv tsis tau tso cai coj mus siv kom tau txais txiaj ntsim los yog coj mus ntxias dag lwm tus. Yog li peb thiaj pom tias yog tej yam uas tsim nyog nrog xyuas.''
Tau muaj cov kev taw qhia kom tej neeg sawv daws tsuas teb tej xov tooj hu tuaj rau yus ntawm tej neeg uas yus paub xwb, yog tsis paub ces tsis txhob teb tsis txhob nrog tus hu xov tooj tuaj rau yus ntawd tham. Source: Getty / Rafael Abdrakhmanov/iStockphoto
Nws tau hais tias "Tej zaum kuj yuav raug neeg phem siv coj mus ua kom ib tug neeg puas koob npe. Piv txwv li coj mus nthuav tej lus taug xaiv ... Peb yeej tau pom tej xwm txheej uas tej suab raug coj mus siv rau tej xwm txheej laj fai kum xeeb (political context) lawm thiab'' nws nws tau teev txog tias tau muaj ib daim video cuav uas tsim Ukraine tus President Volodymyr Zelenskyy tab tom hais kom nws tej tub rog cia li txo lawv tej riam phom thiab kom cia li qhau hau (ua siab swb) rau Russia.
"Tej xwm txheej no yuav muaj peev xwm tsim tau xwm txheej kub ntxhov thiab zej tsoom sawv tawm tsam los yog ua rau muaj kev tsis sib haum xeeb sab seem nom tswv ntawm ntau lub teb chaws txog theem haiv thiab,'' raws li nws tau qhia ntxiv.
Peb ho yuav pov puag tau peb tus kheej li cas?
Kaisar tau ceeb toom tias tsim nyog tej neeg sawv daws yuav tau xyuam xim ceev faj txog tej xov xwm uas coj mus qhia rau hauv online, hais tsi ntsees txog tej xov xwm cuam tshuam txog yus ntiag tug piv txwv li tej video thiab tej suab uas yus kaw, kom thiaj li tsis raug neeg nyiag coj yus tej suab coj mus tsim qog qab siv.
Nws tau qhia ntxiv tias "Peb yeej xav tau qee cov kev pab cuam los ntawm tej platforms uas raug siv coj los tsim tej khoom cuav no, thiab tej platforms uas pheej raug siv coj los tso tej no.''
Whitty kuj tseem tau nqua hu ntxiv rau tej neeg tias kom nco ntsoov ceev faj tas mus li — thiab kom siv lub sij hawm nrog tej neeg yus tsis paub los yog xav tias tej zaum yuav yog neeg phem ntawd tham kom tsawg npaum li tsawg tau.
Whitty tau hais tias "Yog tias muaj ib tug neeg ntawm yus tsev neeg los sis yog ib tug twg uas hu xov tooj ceev nrooj rau yus thiab xav tau txais kev pab cuam ib yam dab tsi sai, ces xav kom yus tsum kiag zoo dua, kom cheem tso ... thiab tom nqab ntawd mam li rov qab hu xov tooj rau tus neeg ntawd dua los yog siv lwm txoj xub ke sib txuas lus nrog tus neeg ntawd thiab ua tib zoo txheeb kom paub tseeb tias tus neeg tab tom nrog yus tham ntawd yog tus tseeb tiag.''
Thiab yog tias muaj peev xwm ua tau tiag ces nws hais ntxiv tias tsuas xav kom tej neeg sawv daws tsuas teb tej xov tooj uas hu ntawm tej neeg yus paub hu tuaj rau yus xwb.
Whitty tau hais ntxiv tias "Yog tsis paub ces tsis txhob quav ntsej txog , thiab kom las mees tsis txhob kub siab txog li.''
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
